काठमाडौं– सुपर ग्यास उद्योग प्रालिमा बुधवार बिहान भएको भिषण आगलागीमा परी दुई जना अग्नीनियन्त्रकको मृत्यु भएको छ । आगो निभाउन गएका वीरगञ्ज महानगरपालिकाको बारुणयन्त्रका कर्मचारी आगोको चपेटामा परी मृत्यु भएको हो । दुई जना अग्नी नियन्त्रकको अवस्था चिन्ताजनक रहेको छ ।
वीरगञ्ज महानगरपालिकाको वडा नम्बर २४ पटेलनगरस्थित सुपर ग्यास उद्योगमा भीषण आगलागी भएको थियो । सुपर ग्यास उयद्योगमा ग्यास बोटलिङ गर्ने ट्यांकबाट ग्यास चुहावट भएर आगलागी भएको थियो । उद्योगमा लागेको आगो अनियन्त्रित भएपछि नजिकका आधा दर्जन गाउँलाई सुरक्षाकर्मीले खाली गराएका छन् । यतिवेला आगो नियन्त्रण गर्न तैनाथ सुरक्षाकर्मी र थप दमकल आगलगी भएको ठाउँसम्म पुग्न सकिरहेका छैनन् । नेपाल र भारतको संयुक्त टोलीले आगो नियन्त्रणको प्रयास गरिरहेको छ ।
ग्यास लिक भएको खबर बिहान साढे ५ बजे महानगरपालिका कार्यालयको बारुणयन्त्र शाखालाई गएको रहेछ । आगो लागेको भन्ने कुरा त्यहाँ भनिएको थिएन् । ग्यास लिक भएपछि उद्योग नजिक पुगेपछि बारुणयन्त्रको धुँवा फ्याँकने साइलेन्सरको झिल्कोले ग्यासलाई भेंटाएपछि बिस्फोट सहितको भिषण आगलगी भएको प्रारम्भीक अनुमान छ ।
यो आगलागीमा परि मृत्यु हुनेमा बारुणयन्त्रका कर्मचारीद्वय यादव अधिकारी र मधुसुदन मिश्र रहेको दमकलका कर्मचारी अम्बर दाहालले जानकारी दिए । ‘मृत्यु हुनेमा सर्लाहीका अधिकारी र तनहुँ डुम्रेका मिश्रको मृत्यु भएको कुरा आएको छ म पनि घटनास्थलतर्फ गइरहेको छु’ कर्मचारी दाहालले भने– ‘घाइतेहरुलाई भने बीर अस्पतालको ट्रमा सेन्टरमा उपचारको लागि काठमाडौं लगिएको छ ।’
चिन्ताजनक अवस्थामा उपचारका लागि लगिएका कर्मचारीमा संजिव नेपाल र अरुण महतो भएको कर्मचारी दाहालले जानकारी दिए ।
मृतकको नजिक गएर सनाखत गर्न नसकेको प्रहरीले जानकारी दिएको छ । यतिवेला भारतबाट समेत प्राविधिकहरुको टोली आएको बुझिएको छ । एक किलोमिटरको एरियामा अहिले घेराबन्दी गरी कसैलाई जान दिइएको छैन् । लिकेज भएको ट्यांकको ग्यास सिद्धिएपछि आगो आफै सकिएर जाने प्राविधिकहरुले बताएका छन् ।
घट्नाक्रम हेर्दा, ग्यास लिक भएको खबर बिहान साढे ५ बजे महानगरपालिका कार्यालयको बारुणयन्त्र शाखालाई गएको रहेछ । आगो लागेको भन्ने कुरा त्यहाँ भनिएको थिएन् । ग्यास लिक भएपछि उद्योग नजिक पुगेपछि बारुणयन्त्रको धुँवा फ्याँकने साइलेन्सरको झिल्कोले ग्यासलाई भेंटाएपछि बिस्फोट सहितको भिषण आगलगी भएको प्रत्यक्षदर्शीले जानकारी दिएका छन् ।
ग्याँस उद्योगमा अझै आगो बलिरहेको छ । धुवाको मुस्लो निस्किरहेको छ । ग्यास उद्योगभन्दा करिब एक किलोमिटरको दुरीमा नेपाली सेना, नेपाल प्रहरी, सशस्त्र प्रहरी बल र हजारौं स्थानीयहरु बसेका छन् । आसपासका गाउँहरु खाली गराइएपछि मानिसहरु घरबार छोडेर निस्केका छन् ।
मानिसहरु घरै छोडेर हिडेपछि कसैको घरमा पनि खाना पाकेन, बालबालिका र बृद्धबृद्धा भोकएको स्थानीयहरुले बताएका छन ।
मनियारी, जगरनाथपुर, पटेल नगर, इटियाही, भवानीपुर, बहुअरी, पर्सौनी लगायतका गाउँका मानिसहरुलाई प्रहरीले घर छोडी टाढा बस्न सचेतका साथै चेतावनी दिएको छ ।