ललितपुर । ललितपुरको महालक्ष्मी नगरपालिका–२ इमाडोलस्थित सार्वजनिक स्थानमा एक महिलासामु अश्लील हर्कत गर्दै गोप्य अङ्ग प्रदर्शन गरेको आरोपमा रक्षा मन्त्रालयमा कार्यरत एक शिक्षा अधिकृत पक्राउ परेका छन्।
पक्राउ पर्नेमा बैतडीको पाटन नगरपालिका–७ स्थायी घर भई हाल इमाडोल बसोबास गर्दै आएका ५५ वर्षीय सुरेन्द्र भट्ट रहेका छन्। उनी सिंहदरबारस्थित रक्षा मन्त्रालयमा शिक्षा अधिकृतका रूपमा कार्यरत रहेको प्रारम्भिक अनुसन्धानबाट खुलेको प्रहरीले जनाएको छ।
जिल्ला प्रहरी परिसर ललितपुर मातहतको प्रहरी वृत्त सातदोबाटोको टोलीले सामाजिक सञ्जालमा घटनासम्बन्धी भिडियो सार्वजनिक भएपछि अनुसन्धान अघि बढाएको थियो। पीडित महिलाले भट्टको आपत्तिजनक गतिविधिको भिडियो खिची सामाजिक सञ्जालमा सार्वजनिक गरेपछि घटना बाहिर आएको प्रहरीले जनाएको छ।
भिडियो भाइरल भएपछि प्रहरीले भट्टको पहिचान गरी नियन्त्रणमा लिएको हो। हाल उनलाई प्रहरी वृत्त सातदोबाटोको हिरासतमा राखिएको छ।
प्रहरीका अनुसार पक्राउ परेका भट्टविरुद्ध मुलुकी अपराध संहिताअनुसार कानुनी प्रक्रिया अघि बढाइएको छ। घटनाबारे थप अनुसन्धान जारी रहेको प्रहरीले जनाएको छ।
ई आर्थिक
सोमबार, असार २२ २०८३