म्याग्दी। म्याग्दीका उम्मेदवारहरूले हिमाली जिल्लाको मान्यता कार्यान्वयनलाई आगामी प्रतिनिधिसभा सदस्य निर्वाचनको मुख्य चुनावी मुद्दा बनाएका छन्।
सात वर्षअघि सरकारले म्याग्दीलाई हिमाली जिल्लामा सूचीकृत गरेको भए पनि बजेट, योजना कार्यान्वयन र कर्मचारी सुविधा कार्यान्वयनमा आउन सकेको छैन।
नेपाली कांग्रेसका उम्मेदवार कर्णबहादुर भण्डारी, एमालेका हरिकृष्ण श्रेष्ठ, नेपाली कम्युनिष्ट पार्टीका अर्जुन थापा र स्वतन्त्र उम्मेदवार महाविर पुनले हिमाली जिल्लाको मापदण्ड लागू गरेर विकास आयोजना र सार्वजनिक सेवा प्रवाह सुनिश्चित गर्ने प्रतिबद्धता व्यक्त गरेका छन्।
म्याग्दीमा ३५ वडा र ६ स्थानीय तहमा ११ दल र एक स्वतन्त्र उम्मेदवार चुनावी प्रतिस्पर्धामा छन्। यहाँ ८६,३९७ मतदाता रहेका छन् भने ८२ मतदानस्थल र १२० मतदान केन्द्र स्थापना गरिएको छ।