ई–आर्थिक, काठमाडौं : नेपाल विद्यार्थी संघका कार्यकर्ताहरुले राष्ट्रपति र प्रधानमन्त्रीलाई गोबर उपहार पठाएका छन् । प्रतिनिधिसभा विघटन गरेको विरोधमा ‘ओली–विद्या गठबन्धन’ लाई गोबर उपहार पठाएको विद्यार्थी नेताहरुले बताएका छन् ।
मध्यरातमा ‘ओली–विद्या गठबन्धन’ ले संविधानको चीरहरण गरेको विरोधमा सांकेतिक विरोध स्वरुप उनीहरुलाई गोबर उपहार पठाइएको नेविसंघको भनाई छ ।
नयाँ बानेश्वरमा राष्ट्रपति र प्रधानमन्त्रीको तस्बिरमा गोबर लत्पत्याएर विरोध जनाएका थिए । सो क्रममा प्रहरीले हस्तक्षेप गरी नेविसंघका निवर्तमान केन्द्रीय सदस्य नवराज त्रिपाठीलाई प्रहरीले नियन्त्रणमा लिएको छ । नेविसंघले त्रिपाठीको रिहाइको माग पनि गरेको छ ।
प्रतिनिधिसभा विघटनका विरुद्धमा विपक्षी दलका नेता कार्यकर्ताहरुले निषेधाज्ञाकैबीच सांकेतिक प्रदर्शन गरिरहेका छन् ।
दलका नेता तथा कार्यकर्ताहरुले मात्रै गरिरहेको विरोध विस्तारै दलका भातृसंगठनहरुमा सर्दै छ । यसैक्रममा नेविसंघलगायत विपक्षी दलको विद्यार्थी संगठनहरुसमेतले विरोध गरिरहेका छन् ।
