१५ भदौ, काठमाडौं । एनआइसी एसिया बैंकको २० प्रतिशत बोनस शेयर सुरक्षित गर्ने बिहीबार (आज) अन्तिम दिन हो ।
बैंकले भदौ ३० गते वार्षिक साधारण सभा गर्न शुक्रबारदेखि साधारण सभा हुने दिनसम्म बुक क्लोज गर्दैछ । सो साधारण सभाबाट बैंकले २० प्रतिशत बोनस शेयर र कर तिर्न १.०५ नगद लाभांश दिने प्रस्ताव लाने भएको छ ।
बुक क्लोज हुनुभन्दा अघि कायम शेयरधनीलेमात्र लाभांश पाउनेछन् भने नयाँ लगानीकर्ताले बिहीबार नै एनआइसीको शेयर किनेर शेयरधनी बनिसक्नुपर्नेछ । हाल कायम शेयरधनी भने स्वतः लाभांशको हकदार हुनेछन् ।
बैंकले प्रबन्धपत्रमा संशोधन गरी अधिकृत पुँजी, चुक्ता पुँजी र जारी पुँजी वृद्धि गर्ने प्रस्ताव समेत पेस गर्नेछ ।
त्यस्तै, सभाबाट सञ्चालकहरुको भत्ता, पारिश्रमिक र सुविधा वृद्धि गर्ने विशेष प्रस्ताव जानेछ ।
चुक्ता पुँजी ६ अर्व ६९ करोड २५ लाख ९७ हजार रुपियाँ रहेको बैंकको बोनसपछि चुक्ता पुँजी ८ अर्ब ३ करोड रुपियाँ ११ लाख १६ हजार पुग्नेछ । बैंकले गत आर्थिक वर्षमा १ अर्ब ४६ करोड ९६ लाख ७२ हजार रुपियाँ खुद नाफा आर्जन गरेको थियो ।