३० साउन, ओमन । खाडीबाट बिदामा गएका घरेलु कामदारलाई फर्केर आउन नेपाल सरकारले रोकेपछि चितवनकी सपना घले घर गएकी छैनन् ।
२० बर्षदेखि खाडीमा हाउसमेडका रुपमा कार्यत घलेले घरमालिकबाट बिदा पाए पनि गइनन् ।
‘हरेक दुइृ दुई बर्षको अन्तरालमा नेपाल जान्थें, एक दुइृ महिना परिवारसँग बसेर फर्कन्थेँ । हामीलाई त आफ्नै सरकारले घर जान पनि रोकिदियो’ उनले भनिन्, ‘आफ्नै सरकारले पो मानसिक तनाव दिएको छ ।’
१३ बर्षदेखि ओमनमा कार्यरत लमजुङकी मधु गुरुङ सरकारले लिएको नीति हचुवा र केटाकेटी खेलेजस्तो गैरजिम्मेवार भएको ठान्छिन् ।
‘यातना दिने, तलब नदिने र शोषण गर्ने त्यही घरमा फेरि फर्किदैनन् भन्ने खाडीमा जो कोहीले बुझेका छन् । मैले तीन पटक श्रम स्वीकृति लिएर एउटै घरमा काम गर्न आएकी छु, उनले भनिन् म त्यही घरमा काम गर्न जान्छु भनदा किन नपाउने ?’
आजको कान्तिपुर दैनिक बाट