२७ वैशाख, काठमाडौं । निर्वाचन सुरक्षा दृष्टिगत गर्दै प्रहरीले गुन्डा नाइके चक्रे मिलनलाई पनि पक्राउ गरेको छ । काठमाडौं प्रहरी परिसर र महानगरीय अपराध महाशाखाको संयुक्त टोलीले चक्रे मिलनलाई महाराजगन्जस्थित उनको निवासबाट पक्राउ गरेको हो ।
यसअघि आइतबार दीपक मनाङेलाई प्रहरीले ठमेलबाट पक्राउ गरेको थियो । काठमाडौं जिल्ला प्रशासन कार्यालयले मनाङेलार्य सोमबार पाँच दिन थुनामा राख्ने अनुमति दिएको थियो ।
काठमाडौं, प्रहरी परिसर प्रमुख छविलाल जोशीले निर्वाचन सुरक्षा दृष्टिगत गर्दै गुन्डा नाइकेहरुलाई पक्राउ गरिएको जानकारी दिए । ‘निर्वाचनमा डनहरु प्रयोग हुने र शान्तिसुरक्षा खल्बलिने सम्भावनाका आधारमा उनीहरुलाई पक्राउ गरिएको हो,’ एसएसपी जोशीले भने । पहिलो चरणको स्थानीय निर्वाचन हुन एकसाता अघि प्रहरीले गुन्डा नाइके पक्राउ गर्न थालेको हो ।
महाशाखा स्रोतका अनुसार स्थानीय निर्वाचनमा गुन्डा नाइकेलाई हिरासतमा राख्ने प्रहरीको योजना छ । ‘हामी सबै डनको खोजी गरिरहेका छौं,’ स्रोतले भन्यो ।आजको अन्नपूर्ण पोस्टबाट