पर्वत । पर्वतको एक सहकारीमा शेयर सदस्यले लगेको ऋण चुक्ता नगर्दा विवाद भएको छ । जिल्लाको कुश्मा नगरपालिका–३ दुर्लुङमा महिलाहरूको व्यवस्थापनमा सञ्चालित उन्नतिशील महिला विकास बहुउद्देश्यीय सहकारी ऋणीकै कारण विवादमा परेको हो ।
ऋण लिएका शेयरधनीले नै लामो समयसम्म ऋण चुक्ता नगरी माइन्युट कब्जामा लिएपछि २ वर्षदेखि लेखापरीक्षण र साधारणसभा समेत हुन सकेको छैन । २०६२ सालमा स्थापना भएको सहकारीले नियमित बचत, ऋण लगानी, पशुपालनलगायत महिला लक्षित आम्दानीका कार्यक्रम सञ्चालन गर्दै आएको छ ।
सहकारीका पूर्व अध्यक्षसमेत रहेका दु्रपती गुरुङ र शेयर सदस्य रिता गुरुङले ऋण तिर्नुको सट्टा उल्टै संस्थाका खातापाता नियन्त्रणमा लिएपछि विवाद बढेको सहकारीका पूर्वअध्यक्ष हीरादेवी थापा मगरले बताइन् ।
‘समयमै ऋण चुक्ता गर्नुस् भन्दै हामीले पटकपटक जानकारी गरायौं,’ उनले भनिन्, ‘त्यो पैसा तिर्नु त परको कुरा, माइन्युट नै खोसेर लैजानुभयो । हामीले धेरैपटक आग्रह ग¥यौं, माइन्युट नल्याएकाले अडिट र साधारणसभा हुनै सकेन ।’ २०७८ मङ्सिर ३ मा उनीहरूले माइन्युट खोसेर लगेको र कार्यालयमा तालाबन्दी गरेको थापामगरले बताइन् ।
शेयर सदस्यले खातापाता फिर्ता दिन अटेरी गर्दै आएको सञ्चालकको दाबी छ । खातापाता नहुँदा सहकारीले लेखापरीक्षण गर्न नसकेको हो । सहकारीका अध्यक्ष राधिका रिजाल पौडेलका अनुसार सहकारीका ३१२ जना शेयर सदस्य छन् । सहकारीले ४७ लाख ८५ हजार रुपैयाँ लगानी गरेको छ । लगानी गरेकोमध्ये १० लाख ७६ हजार रुपैयाँ उठ्न बाँकी छ ।
सहकारीमा २०८ जना नियमित बचतकर्ता छन् । उक्त सहकारीको विवाद अख्तियार दुरुपयोग अनुसन्धान आयोग, जिल्ला प्रहरी कार्यालय र कुश्मा नगरपालिकासम्म समेत पुगे पनि समाधानमा कुनै निकायले ठोस पहल गरेको छैन । कुश्मा नगरपालिकाले दुवै पक्षलाई राखेर विवाद समाधानको प्रयास गरिने बताएको छ । नगरको सामाजिक विकास शाखाअन्तर्गत सहकारी शाखाका प्रमुख ऋषिराम शर्माले उक्त सहकारीको समस्या कार्यालयको प्राथमिकतामा रहेको भन्दै दुवै पक्षलाई राखेर अघि बढ्ने तयारी भएको बताएको समाचार आर्थिक अभियानले लेखेको छ ।