ई-आर्थिक, काठमाडौं । नेकपा एमालेका सांसद सुहाङ नेम्वाङले प्रतिनिधिसभाको बुधबारको बैठकमा इम्बोस्ड नम्बर प्लेट जडान प्रक्रिया तत्काल स्थगन गर्न सरकारसँग माग गरेका छन्।
उनले भने, “सरकारले इम्बोस्ड नम्बर प्लेटको कार्यान्वयन तत्काल रोकी, आवश्यक **पूर्वाधार, प्रविधि र जनचेतना सुनिश्चित गरेपछि मात्र चरणबद्ध रूपमा अघि बढाओस्।”
सांसद नेम्वाङले जनताको दैनिक जीवनमा पहिले नै रहेको कर, बीमा, लाइसेन्स र प्रशासनिक प्रक्रियाको झन्झटबीच इम्बोस्ड प्लेटले थप सास्ती थप्ने बताएका छन्।
उनका अनुसार यो प्रणालीको उद्देश्य, प्रभावकारिता र आवश्यकता बारे जनतामा स्पष्ट जानकारी नहुँदा असन्तोष बढेको छ। उनले यो कार्यान्वयन गर्दा जनताको सहभागिता र समझदारी सुनिश्चित गर्नुपर्ने धारणा राखे।