काठमाडौं । नेपाली बजारमा लगातार दुई दिन बढेको सुनको मूल्य मंगलबार भने उच्च दरले घटेको छ। नेपाल सुनचाँदी व्यवसायी महासंघका अनुसार मंगलबार सुनको मूल्य प्रतितोला ४ हजार ३०० रुपैयाँले घटेर २ लाख ८४ हजार २०० रुपैयाँ कायम भएको छ।
यसअघि आइतबार सुनको मूल्य प्रतितोला १ हजार ६०० रुपैयाँले बढेको थियो भने सोमबार पनि १ हजार ४०० रुपैयाँले वृद्धि भएको थियो। त्यससँगै सोमबार छापावाल सुन प्रतितोला २ लाख ८८ हजार ५०० रुपैयाँमा कारोबार भएको थियो।
मंगलबार चाँदीको मूल्य पनि घटेको छ। महासंघका अनुसार चाँदी प्रतितोला १३५ रुपैयाँले घटेर ४ हजार ३१० रुपैयाँ कायम भएको छ।
सोमबार चाँदी प्रतितोला ४ हजार ४४५ रुपैयाँमा कारोबार भएको थियो। अन्तर्राष्ट्रिय बजारमा सुन तथा चाँदीको मूल्यमा आएको उतारचढाव र विनिमय दरको प्रभावका कारण नेपाली बजारमा पनि दैनिक रूपमा मूल्य समायोजन हुने गरेको छ।