ई-आर्थिक, काठमाडौं । ग्लोबल आइएमई बैंकले अन्तर्राष्ट्रिय वित्त निगम (IFC) सँग डिजिटल वित्तीय सेवा (DFS) र डेटा परिपक्वताको मूल्यांकन तथा फिनटेक साझेदारीको सम्भाव्यता अध्ययन गर्न सम्झौता गरेको छ।
यो पहलअन्तर्गत, विश्व बैंक समूहको हिस्सा रहेको आईएफसीले ग्लोबल आइएमई बैंकको डिजिटल तथा डेटा परिपक्वताको मूल्यांकन गर्नेछ, सुधार गर्नुपर्ने प्रमुख क्षेत्रहरू पहिचान गर्नेछ, र डिजिटल बैंकिङ क्षमता अभिवृद्धि गर्न रणनीतिक सिफारिसहरू प्रदान गर्नेछ। साथै, परियोजनाले फिनटेक साझेदारीहरू अन्वेषण गरी एम्बेडेड फाइनान्स (EmFi) मोडेललाई प्रवर्द्धन गर्नेछ, जसले ग्राहकहरूको दैनिक डिजिटल गतिविधिमा सहज वित्तीय सेवा एकीकरणलाई सक्षम बनाउनेछ।
सहयोगबारे बोल्दै ग्लोबल आइएमई बैंकका प्रमुख कार्यकारी अधिकृत सुरेन्द्र राज रेग्मीले भने, “आईएफसीसँगको साझेदारी हाम्रो डिजिटल रूपान्तरण यात्राको एक महत्वपूर्ण कोशेढुंगा हो। यस पहलले हाम्रो डिजिटल क्षमतामा सुधार ल्याउनुका साथै फिनटेक नवीनता र एम्बेडेड फाइनान्स समाधानहरूलाई अपनाउन मद्दत गर्नेछ, जसले हाम्रा ग्राहकहरू र समग्र वित्तीय प्रणालीलाई फाइदा पुर्याउनेछ।”
आईएफसीको डिजिटल बैंकिङ र फिनटेक साझेदारीमा रहेको विश्वव्यापी अनुभवको फाइदा उठाउँदै, यस सहकार्यले नेपालको बैंकिङ क्षेत्रमा नवीनता प्रवर्द्धन गर्ने, सञ्चालन दक्षता सुधार गर्ने, र सहज डिजिटल बैंकिङ अनुभव प्रदान गर्ने नयाँ मानक स्थापित गर्ने अपेक्षा गरिएको छ।