ई-आर्थिक, काठमाडौं । नेपाल प्रहरीले करिब २५ करोड रूपैयाँभन्दा बढी रकमसहित एकजनालाई पक्राउ गरेको छ।
काठमाडौं उपत्यका अपराध अनुसन्धान कार्यालय टेकुको टोलीले टोखा नगरपालिका-१ झोर क्षेत्रबाट उक्त रकमसहित गएराति एक जनालाई पक्राउ गरेको हो पक्राउ पर्नेमा सिन्धुपाल्चोकका ४३ वर्षीय कुसाङ लामा रहेका छन् । भोटेकोशी गाउँपालिका–१ का लामाले चालक सिट पछाडि फल्स बटम बनाएर रकम राखेको अवस्थामा प्रहरीले पक्राउ गरेको थियो ।
यसअधि लामा ७ केजी सुन तस्करीको एक मुद्दामा पहिल्यै ५ वर्षजेल सजाय काटिसकेका व्यक्ति भएको प्रहरीले जनाएको छ ।
कार्यालयका प्रमुख प्रहरी वरिष्ठ उपरीक्षक रमेश बस्नेतका अनुसार पक्राउ परेका व्यक्तिबाट उक्त परिमाणमा रकम बरामद गरिएको हो।
ना१ ख १६५२ नम्बरको ट्रकबाट नेपाली रूपैयाँ, अमेरिकी डलर, युरोलगायत विभिन्न मुलुकका मुद्रा बरामद गरिएको प्रहरी वरिष्ठ उपरीक्षक बस्नेतले बताए।
काठमाडौंको टोखा नगरपालिकास्थित झोर क्षेत्रबाट २५ करोड १९ लाख २४ हजार ९ सय पाचँ रुपैयाँ बराबरको यूरो र अमेरिकी डलरसहित पक्राउ परेका व्यक्ति रसुवाको केरुङतर्फ जाँदै गरेको प्रारम्भिक अनुसन्धानबाट खुलेको छ ।
पक्राउ परेका लामालाई प्रहरीले मंगलबार दिउँसो पत्रकार सम्मेलनमार्फत सार्वजनिक गरेको थियो ।
