चर्को ब्याज विरुद्ध केही दिन अघि सुर्खेतका व्यवसायीले गरेको बैंक धर्ना कार्यक्रममा सहभागी उद्योगी व्यवसायी ।
ई–आर्थिक, बुटवल । बैंक वित्तीय संस्थाहरुको चर्को ब्याजदर विरुद्धको आन्दोलन व्यापक हुँदै गएको छ । नेपालगञ्ज, सुर्खेततिर चलिरहेको आन्दोलन देशव्यापी बन्ने भएको छ । यसैबीच रुपन्देही व्यापार संघले चर्को बैंक ब्याजविरुद्ध आन्दोलन गर्ने घोषणा गरेको छ ।
राष्ट्र बैंकको गलत नीतिका कारण बैंकहरुले ब्याजदर बढाएका र व्यापाररव्यवसाय चलाउने अवस्था नरहेको भन्दै नेपाल राष्ट्र बैंकविरुद्ध आन्दोलनको घोषणा गरिएको हो ।
राष्ट्र बैंकले जारी गरेको चालु पुँजी कर्जासम्बन्धी मार्गदर्शन २०७९ र त्यसबाट उत्पन्न परिस्थितिप्रति गम्भीर ध्यानाकर्षण भएको जनाउँदै संघले त्यसविरुद्ध आन्दोलनको घोषणा गरेको जनाएको हो । २०७९ भदौ ७ गते इजाजतपत्र प्राप्त बैंक तथा वित्तीय संस्थाबाट प्रदान हुने चालु पुँजी प्रकृतिका कर्जा ल्याएको थियो ।
पहिलो चरणको दबाबका कार्यक्रमअन्तर्गत २०७९ कार्तिक ३ गते राष्ट्र बैंक, सिद्धार्थनगर शाखामार्फत राष्ट्र बैंकका गर्भनरलाई ज्ञापनपत्र बुझाउने र व्यापारिक प्रतिष्ठानहरुमा कालोपट्टी बानेर व्यवसाय गर्ने तय गरिएको छ । त्यसपछि राष्ट्र बैंक, बैंक तथा वित्तीय संस्थाहरुमा धर्ना दिने छ । त्यस समयमा पनि मागको सुनुवाइ नभएमा थप एकल तथा संयुक्त आन्दोलनका कार्यक्रम तय गरिने भनिएको छ ।
संघका अध्यक्ष कृष्णप्रसाद घिमिरे र महासचिव दयानिधि भण्डारीले जारी गरेको विज्ञप्तिमा पछिल्लो समयमा नेपालको अर्थतन्त्र चलायमान हुन नसकेको अवस्थामा बैंक वित्तीय संस्थाहरुबाट बिनाकारण पटक(पटक ब्याजमा भइरहेको वृद्धिले निकै मर्कामा परेका जनाएका छन् । विज्ञप्तिमा बैंक, वित्तीय संस्थाहरुबाट लिएका ऋणको ब्याज अस्वाभाविकरुपमा वृद्धि गरिएको र त्यसमा कसैको निगरानी नहुँदा व्यवसायीहरु पलायन हुने अवस्थामा पुगेको उल्लेख गरिएको छ ।