ई–आर्थिक, काठमाडौं । ट्वीटरमा टेस्ला कम्पनीका सीईओ एलन मस्कले गरेको मत सर्वेक्षणअनुसार उनले आफ्नो १० प्रतिशत हिस्सेदारी बेच्नुपर्ने देखिएको छ । मस्कले कर प्रयोजनको लागि आफ्नो हिस्सेदारी बेच्नुपर्ने सर्वेक्षणले देखाएको हो ।
शनिबार मस्कले ट्वीटरमा गरेको मत सर्वेक्षणमा ३५ लाख बढी ट्वीटर प्रयोगकर्ताले भाग लिएका थिए । सर्वेक्षणमा ५७.९ प्रतिशतले हिस्सेदारी बेच्नुपर्ने पक्षमा मत दिएका छन् भने ४२.१ प्रतिशतले हुन्न भन्ने मत दिएका छन् ।
मत सर्वेक्षणको परिणामअनुसार मस्कले करिब २१ बिलियन डलर बराबरको शेयर बेच्नुपर्ने हुन्छ । अमेरिकी डेमोक्राट्सले प्रस्ताव गरेको ‘अरबपति कर’मा मस्कले सहमति तथा प्रतिवद्धता जनाएका छन् ।
यद्यपि उनले आफ्नो हिस्सेदारी कहिले बेच्ने भनेर सार्वजनिक रूपमा नबताएको समाचार बीबीसीले लेखेको छ ।