ई-आर्थिक, काठमाडौं । निजी क्षेत्रको वायुसेवाप्रदायक कम्पनी गुण एयरलाइन्सद्वारा काठमाडौं-विराटनगर उडान सेवा सुरु गरेको छ । एयरलाइन्सले ३० सिटको जेट्स्ट्रिम जहाजद्वारा काठमाडौं-विराटनगर सेवा सुरु गरेको हो ।
एयरलाइन्सले यसअघि भरतपुर, पोखरा, तुम्लिङटार भैरहवा र नेपालगन्जमा भने नियमित उडान सुरु गरिसकेको जनाएको छ ।
गुण एयरलाइन्सले विस्तारै देशका विभिन्न शहरहरुमा उडान विस्तार गर्दै लैजाने तयारी गरेको छ । यसै क्रममा सिमरा र सुर्खेतका लागि केही दिनमै उडान भर्नेगरी तयारी गरिरहेको छ ।
गुण एयरलाइन्सले आफ्ना दुईवटा अमेरिकी बिचक्राफ्ट र थप गरिएको बेलायती पाँच वटा जेट्स्ट्रिमसहित कुल सात वटा विमानबाट उडान थालेको जानकारी दिएको छ ।
गुण एयरलाइन्स नेपालको प्रतिष्ठित व्यवसायिक घराना गुण समूहले सञ्चालन गरेको हो । यो समूहको एयरलाइन्सको अतिरिक्त वित्तीय संस्था, हाउजिंग, सिनेमा घर, सहकारी, सञ्चार गृह, सुनचाँदीलगायतका क्षेत्रमा लगानी रहेको छ ।