ई- आर्थिक, काठमाडौं । नेपाल सरकारका ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ (कान्छाराम)को कम्पनी कालोसूचीमा परेको छ । ओली सरकारका राज्यमन्त्री तामाङको कम्पनी कान्छाराम कन्स्ट्रक्सन कालोसूचीमा परेको हो ।
सरकारले विभिन्न १८ निर्माण व्यवसायी तथा आपूर्ति कम्पनीलाई कालोसूचीमा राखेको छ । त्यसमध्ये राज्यमन्त्री तामाङको कम्पनीसमेत कालोसुचीमा परेको हो । सार्वजनिक खरिद कार्यालयको मंगलबारको निर्णय अनुसार विभिन्न सरकारी निकायबाट सिफारिस भएका उक्त कम्पनी कालोसूचीमा राख्न सिफारिस गरेको हो । जसमा ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ (कान्छाराम)को कान्छाराम कन्स्ट्रक्सन पनि परेको छ । सार्वजनिक खरिद कार्यालयको सूचनामा कान्छाराम कन्स्ट्रक्सनको मूख्य व्यक्तिमा राज्यमन्त्री तामाङको नाम उल्लेख छ ।
राज्यमन्त्री तामाङको कम्पनीसँगै जेभीको रुपमा रहेको एनबी कन्स्ट्रक्सन समेत कालोसुचीमा परेको छ । एनबीको मूख्य व्यक्ति रमिला लामा र आधिकारिक व्यक्ति दिपक थिङ रहेको सूचनामा उल्लेख छ ।
ती कम्पनीलाई कार्यालयको कात्तिक २१ गतेको निर्णयअनुसार कालोसूचीमा राखिएको सार्वजनिक खरिद कार्यालयले जनाएको छ । कालोसूचीमा परेकाहरूले एक वर्ष दुई वर्ष ६ महिनासम्म कुनै पनि सार्वजनिक निकायको खरिद कारबाहीमा अयोग्य हुन कार्यालयले जनाएको छ ।
नेपाली कांग्रेसका पूर्णबहादुर रामेछापबाट नेकपा एमालेका उम्मेदवार कैलाशप्रसाद ढुंगेललाई पराजित गरेर सांसदमा निर्वाचित भएका थिए ।
