काठमाडौं : निजी विश्वविद्यालयको लेक्चर हलमा माध्यमिक तहका विद्यार्थीहरूको सेमिनारका क्रममा सार्वजनिक रूपमा हस्तमैथुन गरेको आरोपमा एक पुरुष पक्राउ परेका छन्।
घटना मलेसियाको क्वालालम्पुर नजिकैको चेरासस्थित निजी विश्वविद्यालयमा भएको थियो। त्यहाँ माध्यमिक तहका विद्यार्थीहरूका लागि आयोजित सेमिनारको क्रममा एक पुरुषले लेक्चर हलभित्र सार्वजनिक रूपमा हस्तमैथुन गरेको आरोप लागेपछि प्रहरीले उनलाई पक्राउ गरेको हो।
गत शनिबार भएको घटनाबारे जानकारी गराउँदै चेरास प्रहरी प्रमुख सहायक आयुक्त मोहम्मद रोस्दी दाउदले भने, ‘२० वर्ष उमेर समूहका एक संदिग्ध पुरुषलाई सोमबार पेटालिङ क्षेत्रमा चेरास प्रहरीले पक्राउ गरेको थियो।’
‘घटनाको उद्देश्य अझै अनुसन्धानको क्रममा छ। उनलाई तीन दिनको हिरासतमा राखिएको छ,’ उनले विज्ञप्तिमा भनेका छन्।
अनुसन्धानमा संदिग्ध व्यक्ति विश्वविद्यालयको विद्यार्थी नभएको पुष्टि भएको छ। सामाजिक सञ्जालमा घटनाको भिडियो भाइरल भएको छ, जसमा एक शिक्षकले उनलाई हलबाट बाहिर निकालेको देख्न सकिन्छ।
विश्वविद्यालय एशिया प्यासिफिक युनिभर्सिटी अफ टेक्नोलोजी एन्ड इनोभेसनका एक अधिकारीका अनुसार संदिग्धले हस्तमैथुन नगरेको र ‘आफ्नो पाइन्ट मात्र फुकालेको’ दाबी गरेका थिए। उनी विश्वविद्यालयका कर्मचारी वा कुनै पनि तरिकाले संस्थासँग जोडिएका थिएनन्। कार्यक्रम विश्वविद्यालयले नभई विभिन्न विद्यालयहरूले आयोजना गरेका थिए।
प्रहरीले दण्ड संहिताको धारा ५०९ (व्यक्तिको लज्जा भंग गर्ने कार्य) अन्तर्गत अनुसन्धान गरिरहेको छ। एजेन्सी