काठमाडौं। नेपाली बजारमा सुन र चाँदीको मूल्यले नयाँ उचाइ कायम गरेको छ ।
सोमबार हालसम्मकै उच्च विन्दुमा पुगेको सुनको मूल्य मंगलबार फेरि बढ्दै अघिल्लो कीर्तिमान तोडेको हो । आज मंगलबार सुनको मूल्य प्रतितोला १ हजार ८०० रुपैयाँले वृद्धि भएको हो ।
नेपाल सुनचाँदी व्यवसायी महासंघका अनुसार सोमबार प्रतितोला २ लाख ७४ हजार ७०० रुपैयाँमा कारोबार भएको सुन मंगलबार २ लाख ७६ हजार ५०० रुपैयाँ पुगेको छ । यो मूल्य नेपाली बजारमा अहिलेसम्मकै उच्च मानिएको छ ।
यस्तै, चाँदीको मूल्य पनि निरन्तर बढ्दो क्रममा रहेको छ । मंगलबार चाँदी प्रतितोला १४५ रुपैयाँले बढेर ५ हजार ३४० रुपैयाँमा कारोबार भइरहेको महासंघले जनाएको छ । चाँदीको यो मूल्य पनि हालसम्मकै उच्च हो ।
यसअघि सोमबार चाँदी प्रतितोला ५ हजार १९५ रुपैयाँमा किनबेच भएको थियो । आइतबारदेखि चाँदीको मूल्यले लगातार नयाँ रेकर्ड बनाउँदै आएको छ । आइतबार चाँदी प्रतितोला ४ हजार ९९० रुपैयाँमा कारोबार भएको थियो ।