वासिङ्टन । अमेरिकी सिनेटले आर्थिक वर्ष २०२६ का लागि ९०१ अर्ब डलरको राष्ट्रिय रक्षा प्राधिकरण ऐन (एनडीएए) पारित गरेको छ। विधेयक ७७–२० मतले पारित भएको हो र अब राष्ट्रपति डोनाल्ड ट्रम्पको हस्ताक्षरका लागि पुगेको छ।
हाउस र सिनेटले आफ्ना छुट्टाछुटै संस्करणहरूलाई मिलाएर सम्झौता संस्करण तयार पारेका थिए, जसलाई हाउसले गत हप्ता पारित गरेको थियो। ३ हजार पृष्ठभन्दा बढी लामो विधेयकमा सैनिकहरूको करिब ४ प्रतिशत तलब वृद्धि, पेन्टागनको हतियार खरिद प्रक्रियामा सुधार, अमेरिकी गोल्डेन डोम मिसाइल रक्षा प्रणालीको विकास र सैन्य तयारी बढाउने प्रावधान समावेश छन्।
विधेयकअनुसार ट्रम्प प्रशासनले दुई वर्षका लागि वार्षिक ४०० मिलियन डलर गरी कुल ८०० मिलियन डलर युक्रेनलाई हतियार उत्पादनका लागि छुट्याएको छ। यसले युरोप र दक्षिण कोरियामा अमेरिकी सैनिक संख्या घटाउँदा सहयोगी देशहरूसँग परामर्श अनिवार्य बनाएको छ।
अर्कोतर्फ, जहाज निर्माणका लागि २६ अर्ब डलर, विमानका लागि ३८ अर्ब डलर र गोला–बारुद उत्पादन बढाउन २५ अर्ब डलर छुट्याइएको छ। विधेयकले पेन्टागनका विविधता, समानता र समावेशिता कार्यालयहरू खारेज गर्ने, जलवायु खर्चमा १.६ अर्ब डलर कटौती गर्ने, १९९१ र २००२ का इराक युद्ध प्राधिकरणहरू खारेज गर्ने र सिरियामाथि अमेरिकी प्रतिबन्ध स्थायी रूपमा हटाउने प्रावधानहरू राखेको छ।
राष्ट्रपति ट्रम्पले आगामी दिनमा यो विधेयकमा हस्ताक्षर गर्ने अपेक्षा गरिएको छ।