अनलाइन माध्यमबाट पनि मतदाता नामावली सङ्कलनको ‘तयारी’, विदेशमा रहेका नेपालीलाई हुने लाभबारे आशङ्का

एक भूतपूर्व प्रमुख निर्वाचन आयुक्तले आउँदो चुनावमा विदेशबाट समेत मतदाता नामावलीमा सूचीकृत हुने र मतदान गर्न पाउने भन्ने विषयलाई केकसो गरिन्छ भन्ने कुरा निकै पेचिलो रहेको बताए।

वर्षौँदेखि उठ्दै आएको यो विषयबारे सर्वोच्च अदालतले समेत विगतमा परमादेश दिइसकेको छ। निर्वाचन आयोग स्वयंले यसको अध्ययन गरेर सुझाव समेत बुझाइसकेको थियो।

कति बढ्लान् मतदाता ?

मतदाता नामावली ऐन ०७३ मा निर्वाचनको मिति घोषणा भइसकेपछि मतदाता नामावलीमा नाम दर्ता गरिने छैन भन्ने व्यवस्था संशोधन गरेर पछिल्लो अध्यादेश जारी गरिएको हो।

मतदाता नामावली सङ्कलन निर्वाचन आयोगले नियमित रूपमा गर्ने काम भए तापनि चुनावको घोषणा हुनुअघि त्यसले गति लिने गर्छ।

आयोगका अनुसार हाल करिब एक करोड ८१ लाख मतदाता रहेकामा यस प्रक्रियामार्फत् पाँचदेखि सात लाखको सङ्ख्यामा मतदाताहरू थप हुने अनुमान गरिएको आयोग प्रमुख रामप्रसाद भण्डारी बताउँछन्।

निर्वाचन कानुनमा चुनावअघिको १२० दिनलाई निर्वाचन अवधि भनिन्छ। यसअनुसार कात्तिक मध्यपछि निर्वाचन अवधि सुरु हुन्छ।

आयोगका प्रवक्ता नारायण प्रसाद भट्टराईले बीबीसीसँग भने : “कार्यतालिका प्रभावित नहुने गरी दर्ता गर्न सकिने अन्तिम मिति सोही समयआसपास हुने गरी आयोगले निर्णय गर्छ।”