ई-आर्थिक, काठमाडौं । नेपाली कांग्रेसका महामन्त्री गगन थापाले सहकारी प्रकरणमा जोडिएका सबैलाई अनुसन्धानमा ल्याउनुपर्ने बताएका छन् ।
महामन्त्री थापाले सरकारले विधिको शासनमा कुनै सम्झौता गर्दैन भन्ने विश्वास जनतालाई गराउनुपर्ने बताएका छन्। उनले सरकारलाई सुझाव दिदै सहकारी प्रकरणमा विवादमा तानिएका कांग्रेस उपसभापति धनराज गुरुङ र एमाले सांसद ऋषीकेश पोखरेललाई पनि छानबिन गर्न सुझाव दिएका छन् ।
नेपाली कांग्रेसका महामन्त्री थापाले सोमबार काठमाडौंमा राष्ट्र बैंक कर्मचारीहरूको शुभकामना आदानप्रदान कार्यक्रममा सम्बोधन गर्दै थापाले जनतालाई सरकार भएको महसुु हुनुपर्ने र विधिको शासनका कुनै सम्झौता गर्दै भन्ने विश्वास जनतालाई गराउनुपर्ने बताएका थिए ।
उनले सहकारी प्रकरणमा बचतकर्ताको रकम फिर्ताका लागि सरकारले काम अघि बढाउनुपर्ने धारणा राखेका हुन् । सहकारीको बचत ठगी गर्नेहरूको सम्पत्ति बेचेर भए पनि सानो बचतकर्ताको रकम फिर्ता गर्ने काम सुरु गर्नुपर्ने धारणा राखेका थिए ।
महामन्त्री थापाले सहकारी प्रकरणमा दोषी देखिएका सबैलाई कारवाही गर्नुपर्ने भन्दै संसदीय छानबिन समितिको प्रतिवेदन पूर्णरुपमा कार्यान्वयन हुनुपर्नेमा जोड दिए ।
उनले भने, जुनसुकै दलका नेता भए पनि अनुसन्धानमा गल्ती देखिए कारबाही गर्न सरकार पछि हट्न हुदैन।
सहकारी विवादमा रास्वपाका सभापति रवि लामिछाने पक्राउ परेसंगै सहकारी विवादमा परेका कांग्रेस उपसभापति गुरुङ र सांसद पोखरेललाई पनि अनुसन्धान दायारामा ल्याउन विभिन्न राजनीतिक दलहरुले कुरा उठाउन थालेका छन । कांग्रेसका उपसभापति ललितपुरको महालक्ष्मीस्थानस्थित एक सहकारीको बचत हिनामिनामा जोडिएका छन् । भने एमाले सांसद पोखरेल पत्नी मोरङको एक सहकारीको बचत हिनामिनामा तानिएकी छन् ।