ई- आर्थिक, काठमाडौं ।
अविरल वर्षाले सिर्जना गरेको स्थितिलाई लिएर आन्तरिक उडानमा टिकटको मूल्य नबढाउने निर्णय एयरलाइन्स कम्पनीहरुले गरेका छन् । एयरलाइन्सहरुले ३ दिन भाडा नबढाउने सहमति गरेका छन् ।
३ दिन नियमित भाडामै उडान गर्ने गरी सहमति भएको वायुसेवा सञ्चालक संघका अध्यक्ष मनोज कार्कीले जानकारी दिएका छन् ।
यसअनुसार अब सोमबार, मंगलबार र बुधबार सबै एयरलाइन्सहरुले नागरिक उड्डयन प्राधिकरणले तोकेको भाडाको तल्लो विन्दुमै रहेर टिकट बिक्री गर्ने अध्यक्ष कार्कीको भनाइ छ ।
एयरलाइन्स कम्पनीहरुले प्राधिकरणले तोकेको माथिल्लो विन्दुको भाडा लिएर टिकट बिक्री गरेका थिए । तर, भाडा बढाएको भन्दै चौतर्फी विरोध भएपछि नियामक क्यानले छलफलमा बोलाएको थियो ।