ई–आर्थिक, काठमाडौं । भोजपुरका पूर्वसांसद नरेन्द्र बस्नेतको निधन भएको छ । कोरोना सङ्क्रमित बस्नेतको उपचारका क्रममा वीपी कोइराला स्वास्थ्य विज्ञान प्रतिष्ठान धरानमा निधन भएको पारिवारिक स्रोतले जानकारी दिएको छ ।
बस्नेत भोजपुर क्षेत्र नम्बर १ बाट २०४८ सालको संसदीय निर्वाचनमा नेकपा एमालेबाट निर्वाचित बनेका थिए । उनी भोजपुरको दिङ्लामा रहेको षडानन्द सीताराम गुठीको पूर्वअध्यक्ष र अरुण माध्यमिक विद्यालयको पूर्वप्रधानाध्यापक समेत थिए ।
पछिल्लो समय मोरङको खोर्सानेमा बस्दै आएका बस्नेत विभिन्न सामाजिक संघसंस्थामा सक्रिय थिए । ७४ वर्षीय बस्नेतका श्रीमती र दुई छोरा छन् ।
पहिलो विद्यावारिधि गर्ने महिला डा. बानिरा गिरीको निधन
यसैबिच साहित्यकार डा बानिरा गिरीको निधन भएको छ । कवि एवं लेखिका गिरीको ७५ वर्षको उमेरमा आइतबार राति १० बजे निधन भएको हो ।
२० दिन अघि कोरोना देखिएको भएपनि गिरीको निधन हृदयाघातका कारण भएको थियो । हृदयाघातपछि उनलाई नयाँ बानेश्वरस्थित सिभिल अस्पतालमा लगे पनि चिकित्सकले मृत घोषित गरेका थिए । उनी अल्जाइमर्स पीडित थिइन् ।
डा. गिरीलाई विद्यावारिधि गर्ने पहिलो नेपाली महिला हुन् । उनका विभिन्न कविता संग्रह, उपन्यास, निबन्धलगायत प्रकाशित छन् ।