ई–आर्थिक, मोरङ : आकर्षक व्याजको लोभमा सर्वसाधारणको १२ करोड डुबेको छ । आकर्षक ब्याजको दिएर उर्लाबारीका सुन व्यापारी राजेश भन्ने गोपाल गौतमले १२ करोड लिएर फरार भएपछि उनीहरुको उक्त रकम डुबेको हो ।
गौतमले उर्लाबारी नगरपालिका ६ डिबीमार्गस्थित गौतम सुनचाँदी पसल सञ्चालन गर्दै आएका थिए । मंहगो ब्याजको प्रलोभनमा उर्लाबारीका तीन सयभन्दा बढीको पैसा डुबेको छ ।
गौतमले सयकडा २ रुपैयाँ ब्याज दिने सर्तमा सेवाग्राहीसँग रुपैयाँ लिएर पासबुक दिँदै आएका थिए । उनले १ लाखदेखि २० लाख रुपैयाँ ब्याजमा लिएर फरार भएको उजुरी आएको हरीले जानकारी दिएको छ ।
रकम लिएर गौतम फरार भएपछि गौतम पीडित पहल समूह गठन गरेर पीडितहरुले पैसा फिर्ता गराउन संघर्ष थालिसकेका छन् । पहल समितिका अध्यक्ष गजेन्द्र दंगालले बचत गरेको पैसा फिर्ता ल्याउन र दोषीलाई कारबाही गराउन स्थानीय प्रशासनदेखि जनप्रतिनिधिलगायत सरोकारवालाहरूसँग पहल गरिरहेको जानकारी दिए ।
जिल्ला प्रहरी मोरङमा गौतमविरुद्ध ठगी मुद्दा दर्ता गराइएको उनले बताए ।
गौतमको र उनकी पत्नीको नाममा ५२ कित्ता जग्गा पत्ता लगाएर पीडितहरुले मालपोत कार्यालयमा रोक्का गर्न लगाएको छ । गौतमको नाममा २६ र उनकी पत्नी चित्रकुमारी गौतमको नाममा २४ कित्ता विभिन्न ठाउँमा जग्गा रहेको अध्यक्ष दंगालको भनाई छ ।
पीडितहरूले दिएको उजुरीका आधारमा गौतमको खोजी कार्य र अनुसन्धान भइरहेको मोरङ प्रहरीले जानकारी दिएको छ ।