पद्म–भुवनेश्वरी नमूना वृद्ध सेवाश्रममा भोजन गराउन पुगेका राउत दम्पत्ति र साथमा आश्रमकी व्यवस्थापक भवानी कोइराला ।
ई–आर्थिक, नवलपुर : जन्मदिनमा तडक भडक गरी ठूलो लगानीमा रेष्टुरन्ट घरमा पार्टी भोज गर्ने परम्परालाई चुनौति दिंदै सर्लाहीको लालबन्दी नगरपालिका–१३ पत्थरकोटका मोहन राउत दम्पतिले छोरीको जन्मदिनको अवसर पारेर सामाजिक काम गरेका छन् ।
स्थानीय वडा सदस्य समेत रहेका मोहन राउत र उनकी श्रीमती जुना कार्की राउतले वृद्धश्रममा गएर बृद्धबृद्धालाई भोजन गराउँदै आफ्नो छोरीको जन्मदिन मनाएर उदाहरणीय कार्य गरेका हुन ।
राउत दम्पत्तिले छोरी हिमानी राउत तीन वर्षमा प्रवेश गरेको अवसरमा लालबन्दी नगरपालिका–२, जुटपानीमा रहेको पद्म–भुवनेश्वरी नमूना वृद्ध सेवाश्रमका बुवा–आमालाई भोजन गराएका हुन् ।
जन्मदिनमा तडकभडक गर्ने पछिल्लो संस्कारलाई चिर्दै आफूहरु जन्मदिनको बिहानै आश्रममा पुगेर त्यहाँ आश्रय लिई बसिरहेका वृद्धवृद्धालाई मिष्ठान्न भोजन गराएको वडा सदस्य राउतले ई–आर्थिकलाई जानकारी दिए ।
पेशा व्यवसाय र बद्लिँदो समय अनुसार मानिस आफ्नै काममा ब्यस्त भई सामाजिक काममा चासो दिन छाडिसकेको अवस्थामा आश्रमका संरक्षक बासुदेव शरण कोइराला, व्यवस्थापक भवानी कोइराला लगायतले आफ्नै सन्तानबाट अपहेलित भएका ३५÷४० जना वृद्धवृद्धाको पालनपोषण गरेको देख्दा आफू अत्यन्त प्रभावित भएको राउतले बताए ।
आश्रममा पछिल्लो समय जन्मोत्सव, वैवाहिक वर्षगाँठ, दिवंगत आफन्तको तिथी र विभिन्न सामाजिक संघसंस्थाको वार्षिकोत्सव लगायतका अवसरमा सहयोग गर्नेहरु बढिरहेका आश्रमकी व्यवस्थापक भवानी कोइरालाले जानकारी दिईन् ।
यसैक्रममा छोरीको जन्मदिनको अवसरमा राउत दम्पतीले उदाहरणीय सामाजिक कार्य गरेको भन्दै उनीहरुको प्रशंसा समेत गरिन् ।