ई–आर्थिक, काठमाडौं । स्वतन्त्र ऊर्जा उत्पादकहरुको संस्था (इपान) मा नयाँ कार्यसमिति चयन भएको छ । दुई प्यानलबीच चुनावी चर्चाका बीच बरिष्ठ उद्यमी कृष्ण आचार्यको अध्यक्षमा नयाँ कार्यसमिति चुनिएको हो ।
सर्वसम्मत चुनिएको नयाँ कार्यसमितिको तीनवटा उपाध्यक्षमा आशिष गर्ग, गणेश कार्की, मोहन डांगी चुनिएका छन् । त्यसैगरी महासचिवमा गोरे शेर्पा तथा सचिवमा भरत खत्री, बलराम खतिवडा, राम आचार्य चुनिएका छन् । त्यस्तै कोषाध्यक्षमा आनन्द चौधरी चयन भएका छन् ।
नयाँ कार्यसमिति सदस्यमा प्रकाश दुलाल, भरत खड्का, भरत लामिछाने थापा र उत्तम ब्लोन लामा रहेका छन् भने महिला सदस्य अविज्ञा मल्ल र कविता कंडेल चुनिएको इपानले जानकारी दिएको छ ।
गत असार १५ गते हुने तय भएको इपानको निर्वाचन कोभिड–१९ र प्रोक्सी विवादका कारणले रोकिएको थियो । पछि सल्लाहकार र अग्रज जलविद्युत् उत्पादकको मध्यस्थतापछि विवाद समाधान भएर सर्वसहमतिले नेतृत्व चयन हुने मौका पाएको थियो ।
विगतमा सर्वसम्मत रुपमा नेतृत्व चयन हुँदै आएको इपानमा यसपटक भने दुई प्यानल बनाएर निर्वाचन हुने वातावरण तयार भएपछि प्यानल नै बनाएर मनोनयन दर्ता भएको थियो ।
गत असार १४ गते साँझ कार्यालय समयपछि कोरोनाको कारण देखाउँदै जिल्ला प्रशासन कार्यालय ललितपुरले निर्वाचन स्थगन गर्न निर्देशन दिएपछि सबै कार्यक्रम रोकिएका थिए ।