ई–आर्थिक, काठमाडौँ । माछापुच्छ्रे बैंकले प्रदेश १ का झापा र मोरङमा गरी १४ शाखा रहित बैंकिङ्ग सेवा सञ्चालनमा ल्याएको छ ।
झापाका विभिन्न १३ स्थान र मोरङको लेटाङ्गमा १ गरी कुल १४ वटा स्थानमा शाखा रहित बैंकिङ्ग सेवाको औपचारिक सुरुवात गरेको बैंकले जानकारी दिएको छ ।
बैंकिङ्ग पहुँचदेखि टाढा रहेका ग्रामीण भेगमा बैंकले आफ्ना शाखा रहित बैंकिङ्ग सेवा केन्द्रहरु मार्फत अत्याधुनिक बैकिङ्ग सेवा पु¥याउनका लागि यो अभियान चलाएको बैँकले जानकारी दिएको छ।
पछिल्लोपटक थपिएका १४ शाखा सहित बैंकको शाखा रहित बैंकिङ्ग सेवाको संख्या ९७ पुगेको छ । ग्राहक सेवा केन्द्रको रुपमा संचालित उक्त शाखा रहित सेवा केन्द्रहरुबाट खाता खोल्ने, रकम जम्मा गर्ने र झिक्ने, रेमिटेन्स भुक्तानी, साथै कर्जा आवेदन गर्ने समेत व्यवस्था गरेको छ।
बैंकले नेपालमै पहिलो पटक तुरुन्त (रियल टाइममा) खाता खोल्ने व्यवस्था गरेको छ भने चिपमा आधारित डेबिट कार्ड पनि तुरुन्त उपलब्ध गराएको बैंकले जनाएको छ ।