अधिक नाफाका लागि नक्कली काम
सरकारले भारतबाट आयात गरिएका कृषिजन्य सामग्रीमा ५ प्रतिशत भन्सार कर र भ्याट लगाउने गरेको छ । तर, दाना उद्योगलाई भने भ्याट छुट दिनुका साथै भन्सारमा १ दशमलव ६ प्रतिशत मात्र भन्सार महसुल तोकेको छ । यसरी ५ रुपैयाँ भन्सार तिर्नुपर्ने भएमा दाना उद्योगले भने १ रुपैयाँ ६० पैसा मात्रै राजस्व तिरे पुग्छ । नेपाल सरकारको यही नीतिको फाइदा उठाउँदै व्यवसायीले अधिक मुनाफा कमाउन फर्जी दाना उद्योगमार्फत मकै, तोरी, भटमासलगायत कृषि उपज आयात गर्ने गरेको भेटिएको हो ।
धादिङ दाना उद्योगका नाममा अर्बौंको कारोबार
राजस्वको अनुसन्धानका अनुसार ललितपुरको लाली भन्ने स्थानमा रहेको दाना उद्योग ‘धादिङ दाना उद्योग’का नाममा विराटनगर, वीरगन्ज, भैरहवा र नेपालगन्ज भन्सारबाट करिब १ अर्ब रुपैयाँबराबरको कृषिजन्य वस्तु जाँचपास गराएर नेपालमा आयात गरेको पाइएको छ । यसरी कागजमा मात्र अस्तित्वमा रहेको उद्योगका नाममा आयात गरिएका कृषिजन्य सामग्री कहाँ जान्छन् भन्ने खोजी भइरहेको छ । धादिङ दाना उद्योगले विराटनगर भन्सारबाट मात्र आर्थिक वर्ष ०७३-७४ माघदेखि ०७४-७५ को माघसम्म ५० पटक करोडौँ मूल्यबराबरको लाखाैँ केजी मकै आयात गरेको पाइएको छ ।
यसरी खुल्यो रहस्य
पुस १४ गते विराटनगरका भन्सार एजेन्ट कृष्ण थापा र चेतनाथ पौडेलले धादिङ दाना उद्योगका नाममा दुई ट्रक मकै जाँचपास गराएका थिए । उनीहरूले १४ पुसमा ३ लाख ३८ हजार मूल्यबराबरको १३ हजार ३ सय केजी र ५ लाख ६६ हजार मूल्यबराबरको २१ हजार २ सय केजी मकै दुईवटा ट्रकमा विराटनगर भन्सारबाट जाँच पास गराएका थिए । सो मकै आयात गर्ने धनीहरू विराटनगरका सुनील शाह र भारत उत्तर प्रदेशका लोकेश तिवारी तथा भारत कटिहारका विजय गुप्ता हुन् । उनीहरूले नै वीरगन्ज, भैरहवा र नेपालगन्ज भन्सार नाकाबाट सो उद्योगका नाममा राजस्व छुटमा कृषि उपज आयात गर्ने गरेको अनुसन्धानका क्रममा पाइएको छ । पथलैया राजस्वले गत पुसमा नियन्त्रण लिएका दुई ट्रक मकै लिलामी प्रक्रियामा लगेको छ ।
अनुसन्धान जारी भन्दै घटना सार्वजनिक भएन
घटनाको विस्तृत अनुसन्धान गरिरहेको पथलैया राजस्व कार्यालयले अनुसन्धान जारी रहेको भन्दै घटनालाई बाहिर ल्याउन चाहेको छैन । राजस्व अनुसन्धान क्षेत्रीय कार्यालय पथलैयाका प्रमुख दिव्यराज पोखरेलले भने, ‘अझै अनुसन्धानमै छौँ, पूरा भएपछि सबै सार्वजनिक गर्छौं ।’
हरेक वर्ष ३ अर्बको मकै आयात
विराटनगर भन्सार कार्यालयका अनुसार आर्थिक वर्ष ०७३-७४ मा विभिन्न दाना कम्पनीले करिब २ अर्ब ६२ करोड ९९ लाख मूल्यबराबरको पौने ९ करोड केजी मकै आयात गरेका छन् । त्यस्तै, चालू आर्थिक वर्ष ०७४-७५ को माघसम्म २ अर्ब ३५ करोड १० लाख ९७ हजार मूल्यबराबरको मकै आयात भइसकेको छ ।
दाना उद्योगमा राजस्व र अख्तियारको चासो
धादिङ दाना उद्योगका नाममा करोडौँ रुपैयाँ भन्सार छली भएको खुलेपछि राजस्व अनुसन्धान र अख्तियारले दाना उद्योगमाथि निगरानी बढाउन थालेको छ । स्रोतका अनुसार दानाका लागि कच्चा पदार्थ आयात हुने भन्सारको रेकर्ड रुजु गर्ने काम भइरहेको छ । उद्योग नै स्थापना नगरी कागजी उद्योग खोलेर कृषि उपज आयात गर्ने थप उद्योग फेला पर्न सक्ने आशंका गरिएको छ । अनुसन्धानमा संलग्न एक अधिकारीले भने, ‘हामी धमाधम रुजु प्रक्रियामा छौँ, धनीहरू फरार होलान् भनेर अहिले नाम सार्वजनिक गर्न चाहँदैनौँ ।’ नयाँ पत्रिकाबाट