मंगलवार, असोज २४, २०७४, लहान: मुलुकमा गोलीकाण्डका श्रृंखला बढ्न थालेको छ । राजधानी काठमाडौंमा नेपाल निर्माण व्यवसायी महासंघका अध्यक्ष शरद गौचन माथि गोलि हानिएको भोलीपल्ट सप्तरीमा रहेको त्रियुगा डिष्टिलरीका सुरक्षा गार्ड माथि गोली चलाईएको थियो ।
अज्ञात समूहले मंगलबार साँझ सप्तरीको सुरुगा नगरपालिकास्थित सो डिस्ट्रलरीका सुरक्षागार्ड माथि गोली प्रहार गरेको हो । साँझ ७ बजेतिर आएको समूहले डिस्ट्रलरीको गेटमा बसिरहेका सुरक्षागार्ड मोरङको सुन्दर हरैचा नगरपालिका-६ निवासी २५ वर्षीय नवराज कोइरालामाथि गोली प्रहार गरेका हुन्।
गोली लागेर घाइते भएका सुरक्षागार्ड कोइरालालाई उपचारको लागि लहानस्थित सप्तऋषि नर्सिङहोम पठाइएको इप्रका कडरबोनाका प्रहरी निरीक्षक देवेन्द्र दासले जानकारी दिए।
घटनामा संलग्नहरुको खोजी तीव्र बनाइएको र घटनाबारे अनुसन्धान भइरहेको उनले बताए ।