३० जेठ, इटहरी । सुनसरीको इटहरीस्थित पचरुखीमा मंगलबार बिहान एम्बुलेन्स दुर्घटना हुँदा एम्बुलेन्समा सवार बिरामी बालिकाको मृत्यु भएको छ । बालिकाका दुई जना आफन्तहरु घाइते भएका छन् ।
दुर्घटनामा सिराहा गोलबजार नगरपालिका ११ बस्ने ३५ वर्षीया कविता उराउकी ६ वर्षीया छोरी भूमिकाको मृत्यु भएको प्रहरीले जनाएको छ । मृतककी आमा कविता उराउ र २२ वर्षिय आफन्त सन्तोष उराउ घाइते भएका छन् ।
सिरहाको गोलबजारबाट बिरामी लिएर धरानको घोपा जादै गरेको १ च ११९० नम्बरको एम्बुलेन्स बाटो छेउको रुखमा ठोक्किँदा दुर्घटना भएको हो ।
एम्बुलेन्स तीब्र गतिमा रहेकाले दुर्घटना भएको प्रहरीको अनुमान छ । घाइतेलाई उपचारका लागि धरान पठाइएको पुर्व क्षेत्रीय ट्राफिक प्रहरी कार्यालय इटहरीले जनाएको छ ।
एम्बुलेन्सका चालक धनुषा जिल्ला धारापानी १ बस्ने २६ विनोद बाँतरलाई इलाका प्रहरी कार्यालय इटहरीले नियन्त्रणमा लिएको प्रहरीले जनाएको छ ।