काठमाडौं : रूसमाथि युक्रेनले पछिल्लो चार वर्षयताकै सबैभन्दा ठूलो ड्रोन आक्रमण गरेको दाबी गरिएको छ। रूसी अधिकारीहरूका अनुसार मस्कोसहित विभिन्न क्षेत्रमा करिब ८ सय ड्रोन प्रहार गरिएका छन्।
रूसको रक्षा मन्त्रालयले ७९१ वटा युक्रेनी ड्रोन खसालेको दाबी गरेको छ। मस्कोका मेयर सर्गेई सोब्यानिनका अनुसार ६ सयभन्दा बढी ड्रोन मस्को क्षेत्रतर्फ आएका थिए, जसमध्ये १८० वटा नष्ट गरिएको थियो।
रूसी अधिकारीहरूले मस्कोमा भएको आक्रमणबाट मानवीय क्षति नभएको र ठूलो भौतिक क्षतिसमेत नभएको बताएका छन्। यद्यपि रियाजान क्षेत्रमा तीन जना घाइते भएका छन् भने तीनवटा निजी घरमा क्षति पुगेको छ। औद्योगिक क्षेत्रमा रहेको रूसी खुद्रा कम्पनी वाइल्डबेरीजको गोदाममा समेत आगलागी भएको बताइएको छ।
खार्किभमा रूसी क्षेप्यास्त्र आक्रमण, १० जनाको मृत्यु
युक्रेनको उत्तरपूर्वी खार्किभ क्षेत्रमा रूसले गरेको क्षेप्यास्त्र आक्रमणमा कम्तीमा १० जनाको मृत्यु भएको छ भने १७ जना घाइते भएका छन्।
खार्किभ क्षेत्रीय सैन्य प्रशासनका प्रमुख ओलेह सिनिहुबोभका अनुसार पेचेनिही गाउँमा भएको आक्रमणमा सर्वसाधारणको ज्यान गएको हो। आक्रमणबाट १० वटा घर, क्याफे, हुलाक कार्यालय, पसल तथा सातवटा सवारीसाधनमा क्षति पुगेको छ।
युक्रेनी राष्ट्रपति भोलोदिमिर जेलेन्स्कीले घटनालाई ‘क्रूर आक्रमण’ भन्दै रूसले यसको कडा मूल्य चुकाउनुपर्ने चेतावनी दिएका छन्।
यस्तै, सुमी क्षेत्रमा भएको रूसी आक्रमणमा थप तीन जनाको मृत्यु र तीन जना घाइते भएको युक्रेनी अधिकारीहरूले बताएका छन्।
युद्धविरामको साटो युद्ध लम्ब्याएको युक्रेनको आरोप
युक्रेनका विदेशमन्त्री एन्ड्री सिबिहाले रूसले युद्धविरामको यथार्थपरक प्रस्ताव स्वीकार गर्नुको सट्टा युद्धलाई लम्ब्याइरहेको आरोप लगाएका छन्।
उनले रूसी राष्ट्रपति भ्लादिमिर पुटिनले रक्तपात अन्त्य गर्ने प्रस्ताव स्वीकार नगरेको भन्दै सामाजिक सञ्जालमार्फत आलोचना गरेका छन्।
यसैबीच, मस्कोमाथिको पछिल्लो ड्रोन आक्रमणमा बेलायती ड्रोन प्रयोग भएको दाबी गर्दै रूसले बेलायतप्रति समेत आपत्ति जनाएको छ।
बेलायती प्रधानमन्त्री एन्डी बर्नह्यामले भने युक्रेनलाई आफ्नो रक्षाका लागि सहयोग जारी राख्ने बताएका छन्। उनका अनुसार युक्रेनलाई आत्मरक्षाका लागि सहयोग गर्नु बेलायतको निरन्तर नीति रहँदै आएको छ।
बेलायतलाई रूसको चेतावनी
रूसी विदेशमन्त्री सर्गेई लाभरोभले रूसी भूभागमा भएका आक्रमणमा बेलायतको संलग्नता रहेको पुष्टि भए त्यसलाई ‘युद्धमा सहभागिता’ का रूपमा लिइने चेतावनी दिएका छन्।
उनले यस्तो संलग्नताबाट उत्पन्न हुने परिणामको जिम्मेवारीसमेत बेलायतले लिनुपर्ने संकेत गरेका छन्।
रूसी समाचार एजेन्सी आरआईए नोवोस्तीले पछिल्लो ड्रोन आक्रमणलाई गर्मीयाम सुरु भएयताकै मस्कोमाथिको सबैभन्दा ठूलो आक्रमणका रूपमा वर्णन गरेको छ।
रूस र युक्रेनबीचको युद्ध लम्बिँदै जाँदा दुवै पक्षले पछिल्लो समय एकअर्काका भूभागमा लामो दूरीका ड्रोन तथा क्षेप्यास्त्र आक्रमण तीव्र बनाएका छन्।