काठमाडौं। नेपाली बजारमा शुक्रबार सुनको मूल्य घटेको छ। नेपाल सुनचाँदी व्यवसायी महासंघका अनुसार सुन प्रतितोला २ लाख ५८ हजार ४ सय रुपैयाँमा कारोबार भइरहेको छ।
अघिल्लो दिन प्रतितोला २ लाख ६० हजार ४ सय रुपैयाँ रहेको सुनको मूल्य शुक्रबार २ हजार रुपैयाँले घटेको हो। यसअघि मंसिर २९ गते सुन प्रतितोला २ लाख ६० हजार ७ सय रुपैयाँमा कारोबार हुँदै हालसम्मकै उच्च मूल्यमा पुगेको थियो।
यसैगरी, चाँदीको मूल्य पनि घटेको छ। बिहीबार प्रतितोला ४ हजार ८० रुपैयाँमा कारोबार हुँदै कीर्तिमान बनाएको चाँदी शुक्रबार ७५ रुपैयाँ घटेर ४ हजार ५ रुपैयाँमा झरेको छ।
अन्तर्राष्ट्रिय बजारको प्रभावका कारण सुनचाँदीको मूल्यमा उतारचढाव देखिएको व्यवसायीहरूले बताएका छन्।