काठमाडौं । रुसको सेनाले पूर्वी युक्रेनको डोब्रोपिलिया नजिकका दुई गाउँ नियन्त्रणमा लिएको दाबी गरेको छ। डोब्रोपिलिया पूर्वी युक्रेनको एउटा पुरानो कोइला खानी क्षेत्र हो, जुन हालसम्म युक्रेनी सरकारको नियन्त्रणमै रहेको छ।
रुसी रक्षा मन्त्रालयले सामाजिक सञ्जालमार्फत जारी गरेको वक्तव्यमा भनिएको छ, ‘डोनेट्स्क जन गणराज्य अन्तर्गत पर्ने सुवोरोभो र निकानोरीभका बस्तीहरू मुक्त गरिएको छ।’ युक्रेनको पूर्वी डोनेट्स्क क्षेत्रलाई मस्कोले ‘डोनेट्स्क जन गणराज्य’ भनी सम्बोधन गर्ने गरेको छ।
यी दुवै गाउँहरू डोब्रोपिलियाबाट करिब १५ किलोमिटर टाढा रहेका छन्।
हालका दिनहरूमा रुसले यस क्षेत्रमा तीव्र सैन्य दबाब सिर्जना गर्दै युक्रेनी सुरक्षाकर्मीहरूका रक्षा पंक्तिहरू भेदन गर्न सफल भएको बताइएको छ। यो सैन्य प्रगति अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच शुक्रबार हुने बैठकभन्दा केही दिनअगावै देखिएको हो।
एएफपीले अमेरिकी ‘इन्स्टिच्युट फर द स्टडी अफ वार (आइएसडब्लु)’ को तथ्यांकको विश्लेषण गर्दै मंगलबारको दिन २४ घण्टाभित्र रुसी सेनाले गरेको यो प्रगति पछिल्लो एक वर्ष यता सबैभन्दा ठूलो हुने जनाएको छ।
यसअघि, युक्रेनी अधिकारीहरूले जुलाई महिनामा डोब्रोपिलियाबाट बालबालिका भएका परिवारहरूको सुरक्षित स्थानमा स्थानान्तरणको आदेश दिएका थिए।
झण्डै २८ हजार जनाको पूर्व–संघर्ष जनसंख्या रहेको यो सहर हाल निरन्तर रुसी ड्रोन र गोला बर्सातको चपेटामा रहेको बताइएको छ।