ई-आर्थिक, काठमाडौं । राष्ट्रियसभाका सांसदहरूले कृषकहरू मल, बीउ र सिँचाइको अभावमा पिरोलिनुपर्ने अवस्था अन्त्य गर्न सरकारसँग आग्रह गरेका छन्।
आजको बैठकको शून्य समयमा सांसदहरू पूजा चौधरी, रेनु चन्द र विष्णुकुमारी सापकोटाले हालको खडेरीका कारण समयमा रोपाइँ गर्न नसकेका किसानहरूलाई आवश्यक मल र बीउ सहजै उपलब्ध हुने व्यवस्था गर्न सरकारलाई आग्रह गरे।
उनीहरूले किसानलाई भौँतारिनु नपर्ने गरी कृषि सामग्रीको सुनिश्चित आपूर्ति गरिनुपर्नेमा जोड दिए। साथै, कृषि क्षेत्रलाई आधुनिक र व्यावसायिक बनाउँदै रोजगारीको प्रमुख स्रोतका रूपमा विकास गर्न सरकार गम्भीर बन्नुपर्ने आवश्यकता पनि औँल्याए।
सांसदहरूले युवालाई स्वदेशमै रोजगारी दिनुपर्नेमा जोड दिँदै कृषि क्षेत्रलाई प्राथमिकतामा राखेर नीति निर्माण गर्नुपर्ने धारणा राखे।