मस्को । अमेरिकी राष्ट्रपति डोनाल्ड ट्रम्पले युक्रेन युद्ध अन्त्य गर्न रुसलाई अन्तिम चेतावनी दिँदै नयाँ प्रतिबन्ध लगाउने समयसीमा नजिकिएको बताएका छन्। युक्रेनमाथिको आक्रमण नरोके कडा कारबाहीको सामना गर्नुपर्ने स्पष्ट संकेत दिँदै ट्रम्पले शुक्रवारसम्मको समय दिएका हुन्।
ट्रम्पले भने, “के हुन्छ, हामी हेर्नेछौँ। हामी त्यो समयमा निर्णय गर्नेछौँ।” उनले मङ्गलबार पत्रकारहरूसँग कुरा गर्दै मस्को वार्ताको नतिजाको प्रतीक्षा गरिने बताए।
राष्ट्रपति ट्रम्पले यसअघि चीन, भारतजस्ता रुसका व्यापारिक साझेदारहरूलाई लक्षित गर्दै ‘माध्यमिक भन्सार शुल्क’ लगाउने चेतावनीसमेत दिएका छन्। उनले यस्ता कदम रुसी निर्यातमा रोक लगाउने उद्देश्यले चालिने र यसबाट अन्तर्राष्ट्रिय व्यापारमा ठूलो असर पर्न सक्ने बताएका छन्।
रुसी राजधानी मस्कोमा बुधबार अमेरिकी राजदूत स्टिभ विटकफ आइपुगेका छन्। उनलाई रुसी राष्ट्रपतिको विशेष प्रतिनिधि किरिल दिमित्रिभले स्वागत गरेका थिए। विटकफले रुसी राष्ट्रपति भ्लादिमिर पुटिनसँग भेट्ने सम्भावना रहेको भए पनि यसबारे आधिकारिक पुष्टि भएको छैन।
क्रेमलिनका प्रवक्ता दिमित्री पेस्कोभले विटकफसँगको वार्ता ‘महत्त्वपूर्ण, ठोस र सहयोगी’ हुने विश्वास व्यक्त गरेका छन्। साथै उनले अमेरिका द्वाराको शान्ति प्रयासको कदर गरिएको बताएका छन्।
ट्रम्पले भने, “हो, एउटा सम्झौता गर्नुहोस्, जहाँ मानिसहरू मार्न बन्द हुन्छन्।” उनले युद्ध रोक्न रुसलाई सम्झौता गर्न आग्रह गर्दै आक्रमण अन्त्यको विकल्प खुला राखिएको बताएका हुन्।
यसैबीच, युद्धविरामको कुनै प्रगति नभएको छ। इस्तानबुलमा सम्पन्न तीन चरणको शान्ति वार्तामा पनि ठोस सहमति हुन सकेको छैन। मस्कोले युक्रेनलाई कब्जा गरेको चार क्षेत्र छाड्नुपर्ने र पश्चिमी समर्थन परित्याग गर्नुपर्ने माग राखेको छ भने किएभले सो माग अस्वीकार गर्दै युद्धविरामको आह्वान गर्दै आएको छ।
रुसका पूर्वराष्ट्रपति दिमित्री मेदभेदेवसँगको विवादपछि ट्रम्पले दुईवटा आणविक पनडुब्बी तैनाथ गरिएको बताएका थिए। उनले ती पनडुब्बी आणविक हतियारसहितका हुन् वा होइनन् भन्ने खुलाएका छैनन्, न त तैनाथ गरिएको स्थानबारे जानकारी दिएका छन्। अमेरिकी सेनाले यसको विवरण गोप्य राखेको छ।
क्रेमलिनले अमेरिकी आणविक बयानबाजीप्रति चिन्ता व्यक्त गर्दै सबै पक्षलाई संयम अपनाउन आग्रह गरेको छ। पेस्कोभले भने, “रुस आणविक अप्रसारको पक्षधर हो र यस्तो विषयमा अत्यधिक सावधानी आवश्यक छ।”