पाल्पा : रामपुर नगरपालिका–४ देवीस्थानका दिलबहादुर थापाले यस पटक फूल बिक्रीबाट राम्रो कमाइ गरेका छन्। एक हप्तामा उनले एक लाख रुपौयाँ बराबरको सयपत्री फूल बिक्री गरे ।
अहिले उनको बगैँचामा पहेँलपुर सयपत्री फूल फूलेका छन्। वैशाख ३० गते भएको निर्वाचनलाई लक्षित गरेर खेती गरेका थापाले मत परिणाम सार्वजनिक भएपछि फूलमाला बिक्री गर्न भ्याइनभ्याइ भएको बताए।
उनी भन्छन्, ‘निर्वाचनको समयलाई मध्यनजर गर्दै फूल लगाएको हो, व्यापार असाध्यै राम्रो छ, यस पटक आम्दानी गर्ने राम्रो अवसर मिलेको छ, समय ख्याल गरेर खेती गर्नुपर्ने रहेछ, अझै पनि फूलमालाको माग आइरहेको छ।’
यसभन्दा अघि पनि फूलखेती थापा अहिले नसोचेको व्यापार हुँदा दङ्ग थिए। निर्वाचनलाई मात्रै केन्द्रित गरेको हुँदा उनले यस पटक एक रोपनीमा खेती गरेका हुन् ।
‘छोटो समयमा धेरै व्यापार गर्न सफल भएको छु, कतिपयलाई माला गाँस्न नभ्याएर फूलमात्रै पनि बिक्री गर्ने गरेको छु, यतिबेला फूल टिप्ने माला तयार पार्ने र बिक्री गर्दैमा दैनिकी बितेको छ।’, उनले भने।
अहिलेसम्म एक लाख रुपौयाँको व्यापार गरेका थापाको बगैँचामा अझै सो मूल्य बराबरको फूल रहेको छ । पाल्पा, स्याङ्जा, तनहुँलगायतका विभिन्न स्थानबाट फूलमाला खरिद गर्न ग्राहक आएको उनले बताए ।
प्रतिकिलो ५ सय रुपौयाँ र प्रतिमाला १५० रुपौयाँमा धमाधम बिक्री भइरहेको छ ।
अघिल्ला वर्षको निर्वाचनमा खादाको प्रयोग गरेका त्यहाँका नागरिक अहिले मालाको प्रयोगमा आकर्षित बनेका छन्। रासस