ई–आर्थिक, काठमाडौं । पत्रकार शालिकराम पुडासैनीलाई आत्महत्या गर्न दुरुत्साहन गरेको आरोपमा पक्राउ परेका तीनजना विरूद्ध किटानी जाहेरी परेको छ ।
चितवनमा झुण्डिएको अवस्थामा मृत भेटिएका स्व. पुडासैनीको श्रीमती सम्झना पुडासैनीले पत्रकार रवि लामिछाने, युवराज कँडेल र नर्स रुकु भनिने अस्मिता कार्की विरूद्ध काठमाडौं प्रहरी परिसरमा किटानी जाहेरी दिएकी हुन् ।
उनले काठमाडौं प्रहरी परिसर, टेकुमार्फत पुडासैनीको परिवारले जिल्ला प्रहरी कार्यालय, चितवनमा किटानी जाहेरी दिएकी हुन् ।
प्रहरी परिसर टेकु स्रोतका अनुसार २२ साउनमा मृत भेटिएपछि बरामद भएको भिडियोमा नाम उल्लेख भएका टेलिभिजन कार्यक्रम प्रस्तोता रवि लामिछाने, न्यूज २४ टीभीका युवराज कँडेल र नर्स अस्मिता कार्कीविरुद्ध किटानी दिइएको हो । पुडासैनीले हात्महत्या गर्नुअघि लामिछाने, कँडेल र अस्मिताले आफूलाई आत्महत्या गर्न बाध्य बनाएको भन्दै भिडियो रेकर्ड गरेका थिए । सोही आधारमा प्रहरीले उनीहरुलाई पक्राउ गरेको थियो ।
पक्राउ परेका तीनै जनालाई प्रहरीले जिल्ला अदालत चितवनबाट पाँच दिनको म्याद थप गरेर अनुसन्धान गरिरहेको छ ।