माघ १६, २०७४, लखनउ — भारतको उत्तर प्रदेश राज्यमा हिन्दु–मुस्लिम समूहबीचको मुठभेडमा एक किशोरको ज्यान गएपछि बढेको हिंसात्मक घटना क्रममा प्रहरीले १ सय १२ जनालाई पक्राउ गरेको छ ।
हिंसापछि हिन्दु र मुसलमान समूहहरूले एकअर्कालाई दोषारोपण गरेका छन् । भारतीय समाचार संस्था पीटीआईले प्रहरी अधिकारीलाई उद्धृत गर्दै अवस्था नियन्त्रणमा आएको उल्लेख गरेका छन् । तर भारतीय सञ्चारमाध्यमले हिंसात्मक घटना नरोकिएको जनाएका छन् । अधिकारीहरूले हिंसाग्रस्त क्षेत्रमा निगरानी बढाइनुका साथै ठूलो संख्यामा सुरक्षाकर्मी परिचालन गरिएको जनाएका छन् । हिंसामा छोरा गुमाएका सुशील गुप्ताले भने, ‘युवाहरूको एउटा समूहले ‘भारत अमर रहोस्’ भन्ने नारासहित आयोजित र्यालीलाई मुसलमान बहुल क्षेत्रमा त्यस्तो नगर्न भनेपछि दुवै समूहबीच भनाभन भएको थियो । त्यसपछि भएको ढुंगा हानाहान र गोली प्रहारमा मेरो छोराले ज्यान गुमाए । मलाई न्याय चाहिएको छ ।’ किशोरको निधनपछि मुसलमान क्षेत्रमा आक्रमण गरिएको छ । थप हिंसा रोक्न कफ्र्यु आदेश जारी गरिएको अधिकारीले जनाएका छन् ।उत्तर प्रदेशको कासगन्जमा आयोजित एक मोटरसाइकल र्यालीमा दुई धार्मिक समूहका समर्थकले एकआपसमा ढुंगा प्रहार गरेका थिए । गतशुक्रबार ‘तिरंगा मोटरसाइकल र्याली’ का क्रममा राष्ट्रिय स्वयंसेवक संंघको विद्यार्थी संगठन एबीभीपी र विश्व हिन्दु परिषद्बीच भएको झडपमा क्रममा २२ वर्षीय चन्दन गुप्ताको मृत्यु भएपछि उत्तर प्रदेशमा हिंसात्मक घटनामा वृद्धि भएको हो । अधिकारीहरूले दुई पक्षबीचको ढुंगा हानाहानमा किशोरको निधन भएको जनाए पनि अस्पताल स्रोतले उनको गोली प्रहारबाट मृत्यु भएको दाबी गरेको छ । घटनामा घाइते एकको अस्पतालमा उपचार भइरहेको छ । उसको अवस्था गम्भीर रहेको जनाइएको छ । हिंसाका क्रममा पसल र सवारीसाधनमाथि आगजनी गरिएको छ ।