३ चैत, बाजुरा । नेकपा एमालेका नेता एवं पूर्व उपप्रधानमन्त्री तथा अर्थमन्त्री कमरेड भरतमोहन अधिकारी अस्वस्थ भएपछि उपचारका लागि थाईल्याण्ड लगिएको छ । आज बुधबार ११.३० बजे उपचारको लागि थाईल्याण्ड लगिएको हो ।
दिशा र पिसाबसम्बन्धी गम्भीर समस्या देखिएपछि चिकित्सकको सल्लाह अनुसार उहाँ त्यसतर्फ प्रस्थान गर्नुभएको हो । गएको पुस ७ गते दिसा र पिसाब दुबैको समस्या आएपछि उहाँ तीनकुनेस्थित कान्तिपुर अस्पताल भर्ना हुनुभएको थियो ।
आन्द्रामा र युरिनरी सिष्टममा गम्भीर समस्या देखिएपछि कान्तिपुर अस्पतालले बल्खुस्थित बयोधा अस्पतालमा रिफर गरेको थियो । बयोधा अस्पतालमा उहाँको आठ दिनसम्म आईसीयूमा राखेर उपचार भएको थियो । त्यसयता घरैमा रहेर स्वास्थ्य लाभ गरिरहे पनि समस्या झनझन बढिरहेको थियो ।
उहाँलाई जाँच गर्ने बरिष्ठ चिकित्सक डा. युवराज शर्माले मुलुकबाहिर गएर औषधि उपचार गर्न सल्लाह दिनुभएकाले उहाँ थाईल्याण्डको बैकक जानु भएको हो । त्यहाँ उहाँको भेजथानी हस्पिटलमा उपचार हुने छ । उहाँ लामो समयदेखि मुटु तथा दम रोगबाट समेत पीडित हुनुहुन्छ । विक्रम सम्वत् १९९३ वैशाख २२ गते जन्मनु भएका अधिकारी ८० बर्षको हुनुहुन्छ ।