काठमाडौं । उद्योग, वाणिज्य तथा आपूर्तिमन्त्रीमा नियुक्त दीपककुमार साहले पद तथा गोपनीयताको शपथ ग्रहण गरेका छन् ।
राष्ट्रपति कार्यालय शीतलनिवासमा आयोजित समारोहमा राष्ट्रपति रामचन्द्र पौडेलसमक्ष नवनियुक्त मन्त्री साहले शपथ ग्रहण गरेका हुन् ।
शपथ ग्रहण समारोहमा उपराष्ट्रपति रामसहाय प्रसाद यादव, प्रधानमन्त्री वालेन्द्र शाह, सभामुख डोलप्रसाद अर्याललगायतको उपस्थिति थियो ।
निवर्तमान उद्योग, वाणिज्य तथा आपूर्तिमन्त्री गौरीकुमारी यादवले पदबाट राजीनामा दिएपछि साहलाई उक्त मन्त्रालयको जिम्मेवारी दिइएको हो ।
साह यसअघि सीके राउत नेतृत्वको जनमत पार्टीका उपाध्यक्षसमेत रहेका थिए । फागुन २१ गतेको निर्वाचनअघि उनी राष्ट्रिय स्वतन्त्र पार्टी (रास्वपा)मा प्रवेश गरेका थिए ।
जलवायु परिवर्तनलगायतका विषयमा सक्रिय रहेर काम गर्दै आएका साहलाई रास्वपाभित्र प्राविधिक पृष्ठभूमिका प्रभावशाली नेताका रूपमा हेरिँदै आएको छ ।
साह प्रधानमन्त्री वालेन्द्र शाह र नेता अमरेशकुमार सिंहनिकट रहेको चर्चा हुँदै आएको छ । उनलाई प्रधानमन्त्री शाहकै सक्रियतामा रास्वपामा प्रवेश गराइएको दाबीसमेत गरिँदै आएको छ ।