पर्सा । चालु आर्थिक वर्षको ९ महिनामा वीरगञ्ज नाका हुँदै २ अर्ब ९८ करोड रुपैयाँको विद्युतीय सवारीसाधन आयात गरिएको छ। गत आर्थिक वर्षको सोही अवधिको तुलनामा चालु आवमा विद्युतीय सवारीसाधन १०२ प्रतिशत अर्थात् १ अर्ब ५० करोड रुपैयाँ बढीको आयात भएको हो।
वीरगञ्ज भन्सार कार्यालयका सूचना अधिकारी उदयसिंह विष्टले चालु आर्थिक वर्षको नौ महिनामा विद्युतीय सवारीसाधन आयात शतप्रतिशतले वृद्धि भएको बताए। गत आवको नौ महिनामा १ अर्ब ४८ करोड रुपैयाँको विद्युतीय सवारीसाधन आयात भएको थियो।
चालु आवको ९ महिनामा१ अर्ब ४६ करोड रुपैयाँको ४९३ वटा विद्युतीय जिप, कार र भ्यान आयात भएको छ। गत आवको सोही अवधिमा ४८ करोड रुपैयाँको १७२ वटा विद्युतीय जिप, कार र भ्यान आयात भएको थियो।
चालु आवमा ९६ करोड रुपैयाँको सात हजार ३९८ वटा विद्युतीय मोटरसाइकल आयात भएको छ। गत आवको सोही अवधिमा ५५ करोड रुपैयाँको चार हजार २२७ विद्युतीय मोटरसाइकल आयात भएको थियो।
त्यसैगरी चालु आवको ९ महिनामा ५३ करोड रुपैयाँको चार हजार ६०६ वटा विद्युतीय तीन पांंग्रे सवारीसाधन आयात भएको छ। गत आवको सोही अवधिमा ४५ करोड रुपैयाँको ३ हजार ६१३ वटा विद्युतीय तीन पांग्रे सवारी आयात भएको थियो। रासस