काठमाडौं । अमेरिकी राष्ट्रपति डोनाल्ड ट्रम्पले होर्मुजको जलमार्गबाट पार हुने जहाजहरूमा २० प्रतिशत कर लगाउने आफ्नो निर्णय २४ घण्टा नबित्दै फिर्ता लिएका छन्। मध्यपूर्वी नेताहरूसँगको उत्पादक वार्तापछि उनले यो निर्णय उल्ट्याएका हुन्।
ट्रम्पले ट्रुथ सोसियलमा लेखेका छन्, ‘खाडी देशहरूले संयुक्त राज्य अमेरिकामा ठूलो लगानी गर्नेछन्, जसले गर्दा अमेरिकामा लाखौं रोजगारी सिर्जना हुनेछ।’ उनले अब करको सट्टा विभिन्न खाडी राज्यहरूले अमेरिकासँग गर्ने व्यापार र लगानी सम्झौतालाई प्राथमिकता दिइने बताएका छन्।
सोमबार मात्रै ट्रम्पले विश्वको यो अस्थिर क्षेत्रमा सुरक्षा प्रदान गर्न भन्दै जहाजहरूमा २० प्रतिशत ट्रान्जिट शुल्क लगाउने घोषणा गरेका थिए। यद्यपि, उनको यो निर्णयको व्यापक आलोचना भएको थियो। इरानका विदेशमन्त्री अब्बास अराघचीले व्यङ्ग्य गर्दै भनेका थिए, ‘हामी सुरक्षा प्रदान गर्छौँ, तर २० प्रतिशत शुल्क धेरै हो। हामी उचित शुल्क लिनेछौँ।’
अमेरिकी विदेशमन्त्री मार्को रुबियोले पनि अन्तर्राष्ट्रिय जलमार्गमा यस्तो शुल्क लगाउँदा अन्तर्राष्ट्रिय कानुन कमजोर हुने चेतावनी दिएका थिए। मंगलबार पत्रकारहरूसँग कुरा गर्दै ट्रम्पले आफूलाई ‘शुल्कको अवधारणा मन नपर्ने’ बताएका हुन्।
एकतर्फ शुल्कको निर्णय फिर्ता लिए पनि अर्कोतर्फ अमेरिका र इरानबिचको सैन्य तनाव भने उत्कर्षमा पुगेको छ। अमेरिकाले इरानी बन्दरगाहहरूमा पुनः नाकाबन्दी सुरु गरेको छ। अमेरिकी केन्द्रीय कमान्डका अनुसार अमेरिकी सेनाले ५ घण्टासम्म इरानका बुशेहर, चाबहार, जास्क, कोनार्क, अबु मुसा र बन्दर अब्बासमा रहेका सैन्य अड्डाहरूमा बमबारी गरेको छ।
इरानको इस्लामिक रिभोलुसनरी गार्ड कोर्प्सले जवाफमा कुवेत, बहराइन र जोर्डनमा रहेका अमेरिकी अखडाहरूलाई लक्षित गरेको दाबी गरेको छ। कुवेतको रक्षा मन्त्रालयले इरानी आक्रमणबाट आफ्ना नौसेनाको जहाजमा क्षति पुगेको र ४ जना घाइते भएको जनाएको छ। साथै, रुसको विशेष कमाण्ड विमान तेहरान आइपुगेको खबरले क्षेत्रीय तनावलाई थप जटिल बनाएको छ।
यसैबिच, इरानका उपविदेशमन्त्री काजेम घरिबाबादीले अमेरिकासँगको पछिल्लो समझदारीपत्र अब मान्य नभएको घोषणा गरेका छन्। तनावबिच इरानी मिडियाले दक्षिणी सहर र होर्मुज क्षेत्रका टापुहरूमा निरन्तर विस्फोट भइरहेको रिपोर्ट गरिरहेका छन्। एजेन्सी