वासिङ्टन । अमेरिकी पूर्वराष्ट्रपति डोनाल्ड ट्रम्पले युक्रेनमा जारी युद्ध अन्त्यका लागि रूसलाई १० दिनको समयसीमा दिएका छन्। स्कटल्याण्ड भ्रमणपछि अमेरिका फर्कँदै गर्दा मङ्गलबार पत्रकारहरूसँग कुरा गर्दै ट्रम्पले, यदि सो अवधिभित्र युद्धविराम नआए रूसमाथि कडा प्रतिबन्ध लगाइने चेतावनी दिएका हुन्।
उनका अनुसार प्रारम्भिकरूपमा ५० दिनको समय दिइएको भए पनि अब उक्त अवधिलाई १० दिनमा झारिएको छ। उनले रूस–युक्रेन द्वन्द्व तत्काल अन्त्य हुनुपर्नेमा जोड दिएका छन्। यद्यपि, ट्रम्पका भनाइमा अहिलेसम्म रूसी राष्ट्रपति भ्लादिमिर पुटिनबाट कुनै औपचारिक प्रतिक्रिया प्राप्त भएको छैन।
यदि उक्त समयावधिमा पनि ठोस प्रगति नभए, अमेरिका मस्कोमाथि थप आर्थिक शुल्क र दण्डात्मक उपाय लागु गर्ने ट्रम्पले बताएका छन्। उनले युद्धको असर कम गर्न घरेलु तेल उत्पादन वृद्धि गर्ने पनि उल्लेख गरेका छन्, जसले विश्व ऊर्जा बजारमा देखिन सक्ने प्रभावलाई न्यूनीकरण गर्ने विश्वास गरिएको छ।
स्मरणीय छ, सन् २०२२ को फेब्रुअरीमा रुसले युक्रेनमाथि आक्रमण सुरु गरेको थियो। यता, युक्रेनले पश्चिमी सैन्य गठबन्धन (जस्तै नाटो) मा सामेल हुने आफ्नो अधिकार छाड्नुपर्ने रूसको मागलाई सार्वभौमिकताको उल्लङ्घन भन्दै अस्वीकार गर्दै आएको छ। एजेन्सी