काठमाडौं । गुल्मीको रेसुङ्गा विमानस्थलमा परीक्षण उडान सम्पन्न भएको छ । रेसुङ्गा नगरपालिकासँगको सहकार्यमा तारा एयरको परीक्षण उडान सफलतापूर्वक सम्पन भएको हो ।
आज बिहान ११ः१४ मा त्रिभुवन अन्तरराष्ट्रिय विमानस्थलबाट उडेको तारा एयरको नाइन एन एएलओ ट्वीनअटर–४०० वायुयान गुल्मीको रेसुङ्गा नगरपालिका-१० स्थित सिमिचौरमा निर्माण भएको रेसुङ्गा विमानस्थलमा १२ बजे अवतरण भएको थियो । यसअघि पनि २०७५ जेष्ठ २५ गते तारा एयरले नै परीक्षण उडान गरेको थियो ।
उक्त वायुयानलाई तारा एयरका वरिष्ठ चालकद्वय क्याप्टेन सन्तोषकुमार साह र क्याप्टेन सञ्जिव श्रेष्ठले उडान भरेको तारा एअरका प्रवक्ता सुदर्शन बर्तौलाले जानकारी दिए ।
उनका अनुसार जहाजमा गुल्मी जिल्लाबाट निर्वाचित सांसद, नेपाली कांग्रेसका चन्द्र भण्डारी, नेपका (एमाले) उपमहासचिव प्रदीप ज्ञवाली, प्रदेशसभा सदस्य धनेन्द्रबहादुर कार्की, नेकपा (एकीकृत समाजवादी)की सचिव रामकुमारी झाँक्री, रेसुङ्गा नगरपालिकाका प्रमुख खिलध्वज पन्थीलगायत तारा एयर र नेपाल नागरिक उड्डयन प्राधिकरणका अधिकारीहरू सवार थिए । उडानबाट आएका सबै पाहुनालाई माला लगाएरस्वागत गरिएको थियो ।
प्रवक्ता बर्तौलाका अनुसार आइतवार परीक्षण उडान सम्पन्न भएसँगै अब नियमित उडानका प्रक्रिया शुरू गरिनेछ । नियमित उडानका लागि भने कम्तीमा दुईदेखि तीन साता लाग्ने उनको भनाइ छ । रासस