रोचक के छ भने पार्टीभित्र लामो समयदेखि यो नीतिको पक्षमा अन्तरसंघर्ष गरेका उपाध्यक्ष भीम रावल, अष्टलक्ष्मी शाक्य र भीम आचार्यबाटै यसलाई कार्यान्वयन गरिदै छ ।
ई–आर्थिक, काठमाडौं । नेकपा एमालेभित्र ‘एक ब्यक्ति, एक पद’ नीति कार्यान्वयनको तयारी थालिएको छ । एउटै ब्यक्तिलाई पार्टीको उच्च पद र महत्वपूर्ण राजकीय पद गरी दोहोरो जिम्मेवारी नदिन ‘एक ब्यक्ति, एक पद’ नीतिलाई कार्यान्वयन गर्न लागिएको हो ।
रोचक के छ भने पार्टीभित्र लामो समयदेखि यो नीतिको पक्षमा अन्तरसंघर्ष गरेका उपाध्यक्ष भीम रावल, अष्टलक्ष्मी शाक्य र भीम आचार्यबाटै यसलाई कार्यान्वयन गरिदै छ । शाक्य र आचार्य मुख्यमन्त्रीसमेत रहेका छन् । उनीहरुलाई पार्टीको ईन्चार्जको जिम्मेवारीबाट हटाएर एमालेमा यो नीति कार्यान्वयन गरिने एमाले सुदूरपश्चिमका एक प्रभाबशाली नेता बताउँछन् । ‘पार्टीमा अध्यक्षपछिको महत्वपूर्ण दोस्रो बरियताको उपाध्यक्ष पदमा रहेका नेताहरु र मुख्यमन्त्री भएका नेता अब इन्चार्ज हुनुहुन्न । त्यसैले भीम रावल, अष्टलक्ष्मी र भीम आचार्य अब पार्टीको ईन्चार्ज बन्नुहुन्न ।’ उनी भन्छन् ‘यो त उहाँहरुकै माग हो नि ।’
तर तर यसको कार्यान्वयन गर्दा दस्ताबेजमा लिखत र सार्बजनिकरुपमा भने घोषणा गरिने छैन । सुरुमा पार्टीभित्र यो नीतिको माग गर्ने नेता माधब नेपाल भएको हुदा उनले उठाएको मुद्धा सही थियो भन्ने सन्देश जान नदिन गुपचुपरुपमा यो नीति कार्यान्वयन गर्न लागिएको हो । ‘एक ब्यक्ति, एक पद’ नीति कार्यान्वयन गर्न अध्यक्ष केपी शर्मा ओली नै अघि सरेर गृहकार्यमा जुटेको स्रोतले जानकारी दियो । अध्यक्ष ओलीकै यस्तो चाहना भएकाले यो तत्कार्ल कार्यान्वयनमा जाने उनको भनाई छ ।
नेकपा एमालेभित्र यो नीति लागू गर्न बरिष्ठ नेता माधब नेपालले लामो समयसम्म अन्तरसंघर्ष गरेका थिए । उनी हाल एमालेबाट बिद्रोह गरेर अर्कै पार्टी खोलिसकेका छन् । नेता नेपालको यो माग सम्बोधन भएको भए एमाले बिभाजनको अबस्थासम्म नपुग्ने धेरैको भनाई छ ।
नेता नेपालको समूहमा रहेर उपाध्यक्षहरु भीम रावल, अष्टलक्ष्मी शाक्य, युवराज ज्ञवाली, सचिबहरु भीम आचार्य, गोकर्ण बिष्टलगायतका नेताहरुले पार्टीभित्र यो नीतिको अत्यन्त धेरै पैरबी गरेका थिए । यो नीति खासमा पार्टीको उपल्लो पद र राजकीय कार्यकारी पद एक ब्यक्तिमा सीमित गर्न नहुनेसँग सम्बन्धित थियो । त्यसैले नेता रावल, शाक्य र आचार्यहरुले माधब नेपालको समूहमा रहेर अध्यक्ष ओलीलाई पार्टीको अध्यक्ष र प्रधानमन्त्रीमध्ये एक पद रोज्न चर्को दबाब दिएका थिए । यो मुद्धामा पार्टीभित्र निकै ठूलो र शत्रुतापूर्ण धु्रबीकरण भयो । अध्यक्ष तथा तत्कालीन प्रधानमन्त्री ओली यही मुद्धाका कारण गम्भीर संकटमा परेका थिए । तर ओलीले दुबै पदबाट नहट्ने भन्दै संकटको सामना गरे । ओलीको यस अडानलाई रावल, शाक्य, आचार्यजस्ता प्रभाबशाली नेताहरुले पदलोलुप, अहंकारी, अधिनायकबादी र स्वेच्छाचारीजस्ता शब्दले गाली गर्थे ।
पार्टी बिभाजनपछि माधब नेपालको समूहमा रहेर यस नीतिको भयंकर वकालत गर्नेहरु अहिले एमालेमै रहेका छन् । पार्टी जेठ २ मा फर्केपछि उनीहरु कोही उपाध्यक्षसहित साँसद, कोही महासचिबसहित साँसद र कोही पदाधिकारीसहित साँसद छन् । त्यति मात्र होइन अष्टलक्ष्मी शाक्य र भीम आचार्य त मुख्यमन्त्री नै बनेका छन् । यसरी पार्टीको उच्च तहमा रहेका साँसदहरुलाई अरु जिम्मेवारी नदिएर ‘एक ब्यक्ति, एक पद’ नीति कार्यान्वयनका लागि अध्यक्ष ओलीले सक्रियता देखाएका छन् । यसअन्तर्गत भीम रावल, अष्टलक्ष्मी र भीम रावललाई अब प्रदेश ईन्चार्जको जिम्मेवारीबाट हटाइने छ ।
एमाले जेठ २ मा फर्कदा रावल सुदूरपश्चिम, अष्टलक्ष्मी बागमती र भीम आचार्य १ नम्बरको प्रदेशको पार्टी इन्चार्ज हुनेछन् । पार्टीभित्र अन्तरसंघर्ष चलिरहेका बेला अध्यक्ष ओलीले यि प्रदेशमा इन्चार्ज हेरफेर गरेका थिए । तर जेठ २ मा फर्केपछि ईन्चार्जको जिम्मेवारी पनि पाउनुपर्नेमा रावल, शाक्य र आचार्यको जोड रहेको छ । तर अध्यक्ष ओलीले ‘एक ब्यक्ति, एक पद’ कार्यान्वयन गर्नैका लागि उनीहरुको कुराको सुनुवाई गरेका छैनन् । अध्यक्षनिकट नेताहरुले जेठ २ सिर्जनात्मकढंगले कार्यान्वयन गर्ने भनेर यही कुरालाई बारम्बार संकेत गरिरहेका छन् ।
पार्टीलाई जेठ २ मा फर्काएर तल्ला कमिटीहरुमा पुरानै जिम्मेवारीमा बहाल गरिए पनि माथिल्ला पदहरुका नेताहरुमा भने दोहोरो जिम्मेवारी नदिने अडानमा अध्यक्ष ओली देखिएका छन् । यसै कारण सुदूरपश्चिममा रावल, बागमतीमा शाक्य र १ नम्बर प्रदेशमा आचार्यले पार्टीको इन्चार्जको जिम्मेवारीमा फर्कन सकेका छैनन् । ओलीले सुदूरपश्चिममा लेखराज भट्ट र बागमतीमा बादललाई इन्चार्जको रुपमा काम गर्न मौखिक आदेश दिइसकका छन् । यसमा उपाध्यक्षद्वय रावल र शाक्यले गम्भीर असहमति जाहेर गरिसकेका छन् । तर अध्यक्ष ओली यसको सुनुवाई गर्ने पक्षमा छैनन् ।
अध्यक्ष ओलीले आफूनिकट नेताहरुसँग भीम रावल, अष्टलक्ष्मी र भीम आचार्यहरुको केही महिनाअघिसम्मको माग ‘एक ब्यक्ति, एक पद’ भएकाले आफूले त्यसलाई कार्यान्वयन गरिदिने बताउने गरेका छन् । ‘उहाँहरु नै हो, कार्यकारी दुई पद एउटै ब्यक्तिलाई दिनुहुदैन भन्ने । उपाध्यक्ष, साँसद, मुख्यमन्त्री रहेको ब्यक्तिलाई ईन्चार्ज दिने कुरा पनि दोहोरो जिम्मेवारीभित्र नै पर्छ ।’ अध्यक्ष ओलीको भनाई उदृत गर्दै स्रोतले भन्यो ‘उहाँकै मागलाई कार्यान्वयन गर्दा अब आपत्ति मान्नुपर्दैन ।’