रिगा (लाट्भिया)
यूरोपेली केन्द्रीय बैङ्कको आक्रामक मौद्रिक नीतिले यूरोजोनको आर्थिक वृद्धिदरमा उल्लेख्य वृद्धि गर्न नसकेको लाट्भियाका केन्द्रीय बैङ्कका गभर्नरले बताएका छन् । आर्थिक सुधारमा प्रगति नहुनुले ईसीबीको स्टिमुलसको प्रभाव कम भएको गभर्नर इलमर्स रिम्सेभिक्सले बताएका हुन् । ‘ईसीबीको नगद प्रभाहले स्थितिलाई स्थिर बनाएको छ, तर समग्र अर्थतन्त्रमा यसले उल्लेख्य वृद्धि भने गर्न सकेको छैन,’ लाट्भियन रेडियो स्टेशनमा रिम्सेभिक्सले भने । यूरोजोनको मुद्रास्फीति २ प्रतिशतको लक्षित बिन्दुभन्दा बढी पु¥याउन ईसीबीले ऋणपत्र खरीद कार्यक्रमलाई सन् २०१७ को अन्त्यसम्मका लागि विस्तार गरेको छ । गतहप्ता मात्रै ईसीबीका प्रमुख अर्थशास्त्री पिटर प्रेटले मुद्रास्फीतिमा तुलनात्मक खुकुलोपना (क्यूई)को प्रभाव निराशाजनक रहेको बताएका थिए । एजेन्सी