काठमाडौं । साउदी अरबको राजधानी रियादमा आइतबार बिहान तीनवटा विस्फोटको आवाज सुनिएको छ।
समाचार एजेन्सी एएफपीका अनुसार विस्फोट हुनुअघि सहरका बासिन्दालाई हवाई आक्रमणको जोखिमबारे सचेत गराउँदै अलर्ट सन्देश पठाइएको थियो। ती सन्देशमा मानिसहरूलाई सुरक्षित स्थानमा आश्रय लिन सल्लाह दिइएको थियो।
यसैबीच, साउदी अरबको नेतृत्वमा रहेको सैन्य गठबन्धनले आफ्नो हवाई रक्षा प्रणालीले हुथी विद्रोहीतर्फबाट प्रहार गरिएको एउटा ब्यालिस्टिक क्षेप्यास्त्रलाई बीचमै रोक्दै नष्ट गरेको दाबी गरेको छ।
यद्यपि, रियादमा सुनिएका विस्फोटका आवाज क्षेप्यास्त्र खसालिएको घटनासँग सम्बन्धित थिए वा थिएनन् भन्ने अझै स्पष्ट भएको छैन। घटनामा कुनै क्षति वा मानवीय हताहती भए–नभएकोबारे पनि हालसम्म जानकारी सार्वजनिक भएको छैन।
यमनका हुथी विद्रोहीहरूले पछिल्ला दिनमा साउदी अरबका विमानस्थल र तेलसम्बन्धी पूर्वाधारलाई लक्षित गरी आक्रमण तीव्र बनाएका बेला यो घटना भएको हो। हुथी विद्रोहीहरूले यस्ता आक्रमणलाई निरन्तरता दिने चेतावनीसमेत दिएका छन्।