आज आयोजित पत्रकार सम्मेलनमा कृषि विकास महाशाखा प्रमुख तथा सहसचिव डा. रामकृष्ण श्रेष्ठले मल आपूर्ति नियमित रूपमा भइरहेको जानकारी दिँदै किसानलाई आवश्यकताअनुसार वितरण भइरहेको बताउनुभयो ।
उहाँका अनुसार पश्चिम एसियामा जारी द्वन्द्वका कारण अन्तर्राष्ट्रिय आपूर्ति प्रणाली प्रभावित हुँदा टेन्डर भइसकेको मल नेपाल आइपुग्न ढिलाइ भएको हो । ‘स्ट्रेट अफ होर्मुज’ क्षेत्रमा देखिएको अवरोध हट्नेबित्तिकै टेन्डर गरिएको चार लाख ९१ हजार मेट्रिक टन मल नेपाल भित्रिने अपेक्षा गरिएको उहाँले जानकारी दिनुभयो ।
मन्त्रालयले द्वन्द्वकै प्रभावका कारण विगत वर्षको तुलनामा रासायनिक मलको मूल्यसमेत बढेको जनाएको छ ।
सहसचिव श्रेष्ठले विश्व बजारको अनिश्चित अवस्थालाई ध्यानमा राख्दै किसानलाई प्राङ्गारिक मलको प्रयोग बढाउन आग्रह गर्नुभयो । साथै, रासायनिक मलको अत्यधिक प्रयोगले माटोको स्वास्थ्यमा असर पर्ने भएकाले सन्तुलित रूपमा मल प्रयोग गर्न किसानलाई अनुरोध गरिएको छ ।