काठमाडौं । आर्थिक वर्ष २०८२/८३ को पहिलो छ महिनामा नेपाल सरकारको कुल खर्च रु. ६ खर्ब ९० अर्ब २२ करोड पुगेको छ। महालेखा नियन्त्रक कार्यालयका अनुसार समीक्षा अवधिमा चालु खर्च रु. ४ खर्ब ८७ अर्ब १४ करोड, पुँजीगत खर्च रु. ४९ अर्ब ४३ करोड र वित्तीय व्यवस्थाका लागि खर्च रु. १ खर्ब ५३ अर्ब ६५ करोड रहेको छ।
त्यसैगरी, नेपाल सरकारको कुल राजस्व परिचालन (प्रदेश र स्थानीय सरकारमा बाँडफाँट हुने रकमसमेत) रु. ५ खर्ब ७७ अर्ब ४० करोड पुगेको छ। यसमध्ये कर राजस्व रु. ५ खर्ब १६ अर्ब १२ करोड र गैर–कर राजस्व रु. ६१ अर्ब २८ करोड रहेको छ।
नेपाल सरकारको नगद मौज्दात पनि उल्लेखनीय रूपमा बढेको छ। पुस मसान्तसम्म सरकारका विभिन्न खातामा रु. ३ खर्ब ४६ अर्ब ३७ करोड नगद मौज्दात रहेको छ, जुन असार मसान्तमा रहेको रु. १ खर्ब ४९ अर्ब ८३ करोडको तुलनामा धेरै बढी हो।
प्रदेश सरकारको खर्च र स्रोत परिचालन
समीक्षा अवधिमा प्रदेश सरकारहरूको कुल खर्च रु. ३९ अर्ब ८७ करोड र कुल स्रोत परिचालन रु. ९१ अर्ब ५४ करोड रहेको छ। यसमा नेपाल सरकारले हस्तान्तरण गरेको अनुदान र बाँडफाँट हुने राजस्व रु. ६९ अर्ब ३३ करोड र प्रदेश सरकारले परिचालन गरेको वा अन्य स्रोतबाट प्राप्त राजस्व रु. २१ अर्ब ८३ करोड समावेश छ।
नेपाल सरकार र प्रदेश सरकारको खर्च तथा राजस्व सम्बन्धी तथ्याङ्कले देशको आर्थिक र वित्तीय स्थिति दुवै मजबुत हुँदै गएको संकेत गर्दछ।