ई-आर्थिक, काठमाडौं । नेपाली बजारमा सुन र चाँदीको भाउ फेरि बढेको छ। आज सुनको मूल्य प्रतितोला २ हजार ८०० रुपैयाँले वृद्धि भएको छ भने चाँदीको मूल्यमा पनि उल्लेख्य बढोत्तरी देखिएको छ।
नेपाल सुनचाँदी व्यवसायी महासंघका अनुसार आज छापावाल सुन प्रतितोला २ लाख ७० हजार ६०० रुपैयाँमा कारोबार भइरहेको छ। अघिल्लो कारोबार दिन अर्थात् शुक्रबार सुन प्रतितोला २ लाख ६७ हजार ८०० रुपैयाँमा किनबेच भएको थियो।
यस्तै, चाँदीको मूल्य पनि आज प्रतितोला २१० रुपैयाँले बढेर ४ हजार ९९० रुपैयाँ पुगेको छ। शुक्रबार चाँदी प्रतितोला ४ हजार ७८० रुपैयाँमा कारोबार भएको थियो।
यससँगै चाँदीले यसअघि पुस २३ गते कायम भएको उच्च मूल्यलाई उछिन्दै नयाँ कीर्तिमान बनाएको छ। पुस २३ गते चाँदी प्रतितोला ४ हजार ९३५ रुपैयाँमा कारोबार भएको थियो।